Ёрдамчиёни ӯ баробари хироҷ духтарони соҳибҷамоли ба балоғатрасидаро ҳам бо зӯрӣ ба қаср мебурдаанд.
Сиёҳак дар шаҳри Чорсӯ ҳайкалтарошӣ мекардааст. Вай аз чӯбу санг муҷассамаҳои гуногун сохта, онҳоро ба мухлисони ин намуди санъат туҳфа мебурдааст. Музду маоши меҳнаташ зиндагӣ ва маишати ӯро таъмин мекардааст. Сиёҳак умуман ҳунарманди гулдасти ба худаш тинҷ будааст.
Рӯзе як корвонбошии савдогар омада, хоҳиш мекунад, ки бюст (нимпайкара)-и биринҷии духтари ягонаи ӯ – Зарринаро бунёд кунад. Сиёҳак гуфтааст, ки барои ин Заррина бояд якчанд маротиба назди вай омада нишинад, то ки нусхаи ӯ шабеҳу бенуқсон барояд. Корвонбошӣ розӣ шуда, духтарашро ба ҳавлии ҳайкалтарош фиристодааст. Ана, ҳамин дам қиссаи муҳаббати Сиёҳаку Заррина оғоз меёбад.
Сиёҳак ҳайкалтароширо фаромӯш карда, соатҳо бо Заррина нигоҳ карда мешинад. Аз тарҳи ҷозибаноки рухсора ва қомати зебои ӯ чашм канда наметавонад. Заррина низ ба Сиёҳаки ситорагарм дил бохта, бо баҳонаи ҳайкал зуд-зуд ба назди ӯ меояд, аз суханони пурмеҳраш лаззат мебарад, гул-гул мешукуфад.
Заррина шабҳо дар фироқи ошиқаш хобаш намебарад, оҳи сӯзон аз ҷигари бирён мекашад.
Рӯз ки шуд, болу пар бароварда сӯйи Сиёҳак медавад. Ниҳояти кор онҳо ба ҳамин хулоса меоянд, ки бе якдигар зиндагӣ карда наметавонанд ва ин матлабро ба корвонбошӣ гуфтанӣ мешаванд.
Корвонбошӣ арзи муҳаббати ошиқу маъшуқро шунида розӣ мешавад, ки духтарашро ба Сиёҳак диҳад. Баъд аз ин рӯзҳои фирӯзи Сиёҳаку Заррина шурӯъ мегардад. Дили онҳо ба як оҳанг тапида, ҳар ду худро дар арши аълои бахту саодат мебинанд.
Аммо ин тантанаи ошиқон дер давом намекунад. Арафаи тӯй дар кӯча яке аз аҷинаҳо Зарринаи зеборо дида мемонаду рафта ба Қолабшоҳ ҳусну латофати ӯро таъриф мекунад. Қолабшоҳ мефармояд, ки Зарринаро зуд ба ҳарами дарбор гирифта оранд. Корвонбошии мискин «хуб шудааст, Заррина пагоҳ ба қаср меравад» гуфта ваъда медиҳаду ходимони шоҳро мегуселонад. Бегоҳӣ вай ба арӯсу домод воқеаро баён карда, зор-зор мегиряд. Мегӯяд, ки дигар илоҷе несту Сиёҳак бояд ба тақдири шум тан диҳад. Заррина аз ин қарордоди падар беҳуш мешавад.