-Чӣ хел Мирзои Абдураззоқ аз як духтараки деҳотӣ ба ҷон омадаву ба дигараш дил баста?
-Баъди хатми мактаби миёна Ҷамилаи Ҷамшед ба шаҳр омадааст, то бахти хешро дар синамо санҷад. Ба ҳамин хотир ӯ ҳуҷҷатҳояшро ба шуъбаи актёрии донишкадаи ҳунарҳои зебо супоридааст, вале аз имтиҳони аввал баҳои ғайриқаноатбахш гирифтааст. Рӯзе тасодуфан тақдир ӯро бо муаллими донишгоҳи дигар Мирзои Абдураззоқ рӯ ба рӯ намудааст ва олими машҳур ба ӯ ваъда додааст, ки соле пас ӯ донишҷӯ хоҳад шуд.
-Сипас ӯ ба муаллим дил додааст, ҳамин хел?
-Аз дӯсти то муҳаббат ҳамагӣ як қадам роҳ...
-Намедонам, намедонам.
-Фарз намудем, ки шумо намедонед ва ё донистани ҳақиқат бароятон душвор аст, вале натиҷаи он дӯстӣ ва дастгирӣ бараъло аён аст.
-Тифли вайро дар назар доред?
-Бале.
-Гуфтед, ки ӯро Юсуф ном рафиқе ҳаст?
-Гуфтам.
-Юсуф бошад аз рӯзгори Ҷамила хабардор шуда меистад, ҳамин хел?
-Аз рӯи иттилои гирифтаам, чунин аст.
-Рафту Ҷамила Юсуфро барои амалӣ намудани ниятҳои...
-Агар чунин мебуд, ӯ ҳаргиз ном ва ҷои кори Юсуфро ба забон намеовард.
-Шояд, вале мо наметавонем сари ҳамин масъала андеша накунем.
-Андешаҳои банда дар ин ҷода дигархелтаранд.
-Хуш андешаи шумо?
-Ҷамила ниҳоят ҷавон аст ва ӯ наметавонад як умр танҳо бошад, гумон мекунам, ки вай нисбати Юсуф бетафовут нест.
-Хулосаатонро бо чӣ асоснок мекунед?
-Ҳар гоҳ ҷавонзан номи Юсуфро ба забон меовард, лаппиши овозаш тағйир меёфт ва чашмонаш медурахшид.
-Ҳамаи ҳамин лаппишҳоро дар нота ва дурахшро дар кометаи аз сайёра берун омада шумо рафиқ капитан муҳаббат пиндоштед?