• Ў бо Хушнуд Замир дӯст буд, вале худ аз забони муҳосиби сӯзанхӯрда шунидӣ, ки қимати он дўсти чӣ боре овард.
• Набошад муҳаббат.
• Ҳаминаш ба мантиқ наздиктар аст.
• Пас чаро ў ному насаби хешро нагуфт?
• Ному насаби ўро ҳамсари қонунии Сафо Боқӣ ҳам медонад.
• Чӣ хел медонад?
• Ҳамин хел одӣ.
• Пас чаро Бонози Даврон дар ин бора чизе нагуфт?
• Ў нағз медонад, ки чунин амал баробари теша ба пой хеш задан аст.
• Чӣ ҷойи тарс, охир на ў, балки шавҳараш муҳаббати вайро поймол намудааст ва аз пайи дигаре рафтанӣ шудааст.
  Дар чунин мавридҳо ҳатто қонун ҳам ба тарафи ўст, ин ҷо бошад, ў ба бозиҳои пасипардагии шавҳар муросо намуда, ҳатто ному насаби нафареро, ки шавҳарашро аз ў нияти рабудан дошт, пинҳон медорад.
  “Ин чӣ шӯрест, ки дар даври қамар мебинам?”49 - шунидам нидои қалби хеш.
• Таърих ҳам чунин ҳодисаҳоро дар ёд надорад. Дили занҳо ниҳоят ҳассосанд ва ҳаргиз нафареро, ки дар муҳаббат садди роҳашон гаштааст, намебахшанд.
• Бовар намекунам, - қариб ки бо овози нимшунаво гуфтам ман.
• Ба чӣ?
• Аз он ки Бонози Даврон умуман дар бораи мавҷудияти маҳбубаи ҳамсараш хабар дошта бошад.
• Далел мехоҳӣ?
• Албатта.
• Сафо Боқӣ дар бораи ба Ҳисор рафтанаш ба ҳамсараш лаб накушода буд.
• Пас чаро ў чунин гуфт?
• Сафо Боқӣ дӯсташро огоҳ намуда буд, ки ба Ҳисор меравад.
• Пас Бонози Даврон дар ин бора аз куҷо хабар ёфт?
• Аз забони дӯсти шавҳараш, аз забони марде, ки ба қавли Хусрави Раҳим чун гург дар ҷомаи меш буд.

49 Сухан аз Ҳофизи Шерозӣ.