Марди афғон чӣ ҳам мегуфт? Аз дўғу пипусаи аскари бегона ҳаросида, аз ҳамкорӣ бо онҳо розӣ шуд. Он чӣ гуна ҳамкорӣ буд, ў медонисту афсари шуравӣ Дороб Қамар…
Занги дар оҳиста садо доду Дороб Қамар овоз рӯшан кард: - Дар кушода.
Лаҳзае пас Сайф ва Ҳусайн пушти дар, чун замони дар Афғонистон буданашон рост шуда, амри командирро нигарон шуданд.

• Хуш…
• Гап ҳамон гап, - риштаи суханро ба даст гирифта гуфт собиқ сержанти хурд Сайф Насим, ки дар нисбати Ҳусайн Акбар командир ҳисоб мешуд.
• Шумо чӣ?
• Дар асоси дастури шумо дурустакак адабашро додем, - ҳисобот дод командири хурд.
• Ҳоло вай дар куҷост?
• Дар ҳамин ҷо.
• Боварӣ доред, ки зинда мемонад?
• Ганда мурданӣ надорад, рафиқ капитан.
• Ман хеҷ намефаҳмам, ки он дипломати зормонда куҷо шуд?
• Вай дар дасти ҳамон худозада.
• Дар дасти Сайёд Ватан?
• Не, дар дасти ҳамин Хушдил.
• Дар ин ҷо зери коса нимкосае ҳаст.
• Чӣ хел нимкоса?
• Дар зери сангчарх мондани мошини Сайёд Ватан. Оё дар ин бора шумо андеша накардед?
• Дар ин бора мо аз худи вай пурсон шудем, бо тамоми қоидаҳояш.
• Вай чӣ гуфт?
• Алибӣ дорад, дар ин бора шумо ҳам хабар доред.
• Алибиаш аз сараш монад. Акнун шумо ба ҳамон маҳал равед, шояд ягон нафар аз ин ҳодиса хабардор аст.
• Милиса аз ин тадқиқоти мо огоҳ гардад - чӣ?
• Кўшиш намоед, ки огоҳ нагардад. Аз пайи кор шавед!