Ҳикмат Зариф бо ишораи даст ба вай рухсати даромадан дод.

• Аз рўйи нишондоди кадом як сағираи бепадар шуда, мо наметавонем ба сари хеш бало биёрем, - то ба курсӣ рафта нишастанаш шунид ў овози нотиқро.
  Муртазо Дўст болои курсии пушти дар амонат нишаста, гўш ба қимор шуд.
• Охир мо ҳуқуқ ҳам надорем, ки дидаю дониста чунин хабарро мадди назар намоем.
• Рафиқ майор, мо ҳам шуморо мефаҳмем, вале набояд аз рўйи як кайк шуда, пўстинро оташ занем.
• Чӣ хел пўстинро? Шумо чиҳо гуфта истодаед? - инони ихтиёр аз даст дода луқма партофт Муртазо Дўст.
• Гўё ки намедонед?
• Чиро?
• Он чи ки баробари ба қайд гирифтани гузориши шумо фоизи кушодашавии ҷиноятҳо то кадом андоза паст мешавад.
• Барои ҳамин ҳам мо бояд ба ҳодисаи мазкур аз паси панҷа нигоҳ намоем?
• Аз рўйи кадом як хабаре, ки касе дар суроғаш нест, сеюним фоиз паст намудани кушодашавии ҷиноятҳои ноаён…
• Суханатонро набуред.
• Ман аллакай суханамро гуфтам, худатон як бори дигар андеша намоед, рафиқ капитан, ба тарафи Муртазо Дўст нимнигоҳе намуда, ба курсӣ нишаст нотиқ.
• Рафиқ капитан, акнун шумо имконияти пурра доред, ки фикру ақидаи хешро баён созед. Ёдрас мешавем, ки дар давоми сухан гуфтани дигарон, луқма партофтан аз рўйи одоб нест,- ба тарафи Муртазо Дўст нигариста гуфт Ҳикмат Зариф.
  Муртазо Дўст аз ҷой бархост. Суханони сардори ШКД чун нештар аз мағзу устухони вай гузаштанд. Ба замми он ки ў ин субҳ ба кор дер омад, боз дар сухангўӣ андоза нигоҳ надошт… Шояд то ҷое ҳақ ба ҷониби сардори бахши кофтукови ҷиноятӣ майори милиса Одина Валихон бошад?
  …
• Чаро хомўш шудед? - Муртазо Дўстро аз байни андешаҳо берун овард Ҳикмат Зариф.