Чунин ҳодисаҳо ҳамарӯза дар ҳаёти инсонҳо рух медиҳанд ва ҷой таассуфашон ҳам нест, чунки ӯ ва он донишҷӯдухтаре аз факултаи ҳуқуқ ҳанӯз аз қайди никоҳ нагузашта буданд ва ягон масъулияти ҷиддиеро дар самти муносибатҳои оилавӣ ба душ надоштанд, вале чунин амал барои аз паси панҷа нигаристани тафтишот нисбати нафаре, ки дар уфуқ баъди он ғурраи сармозада рӯйи роҳ баромад, ғайриимкон буд.
Аз ҳамин лиҳоз банда лаҳзаи вохӯрии аввалинамро бо Фирӯзи Файз болои монитори хотирам оварданӣ шудам.
Дар он лаҳзаҳо ман дар айвон ҳамроҳи ташхисгари тиббӣ - судӣ сари ҳолати ба вуқӯъпайваста мавриди баҳс қарор доштам. Ҳарчанд Воҳид Камол тариқи телефон бандаро бовар кунонида буд, ки ҳодисаи дар ошёнаи ҳафтуми бинои рақами 59/6 – и кӯчаи Бухоро рухдода ҳодисаи тасодуфист ва боз кадоме аз эшон хоҳиш намуда... Ин ҷо бошад, ташхисгари тиббӣ - судӣ хулосаи хешро бо овардани далелҳо тарзе баён намуд, ки банда ба рух додани куштор ба тамом бовар намудам ва дар ҳоле, ки мо ҳанӯз сари масъалаи мавриди таваҷҷуҳамонро бедоркунанда нуқта нагузошта будем, Фирӯзи Файз ҳамроҳи ҳамсояаш Комрони Нодир вориди хона шуданд. Дар лаҳзаи аввали вориди манзили истиқоматиаш шудан ӯ ҳатто ба мо - ду нафаре, ки сари баҳс қарор доштем аҳамияте надода хизматгордухтар Сабоҳати Комилро ово намуда, аз вазъи ҳамсараш Мижгон пурсон шуд. Чун аз санг садо омаду аз Сабоҳати Комил не, ман эшонро аз ҳодисаи ба сари ҳамсараш омада огоҳ намудам ва чун ӯ вориди меҳмонхона шуда худро болои ҷисми беҷони ҳамсар партофта, ашки надомат рехт ва Комрони Нодир ӯро бо азобе бо суханони тасаллидиҳанда аз меҳмонхона баровард.
Бо шунидани хабари марги ҳамсар ӯ кӯшид худро ба даст гирад, вале мо дар замираш на ғам ва на тарсро мушоҳида накардем. Дар ҳамон лаҳза симои вай ҳолатеро ба ёди ман овард, ки нафаре ҳушу ёдаш дар гӯш кардани латифа аст ва ба нохост касе аз вай чизеро пурсон мешавад. Дар ҳамон лаҳзаҳо ман ба бегуноҳии вай қариб бавар кардам.