— Рафиқ Умарқулов, иҷроиши плони маҳсулоти чорво дар чӣ ҳол аст?
— Бад не, Рифъат Ҳоҷиевич?
— «Бад не»-ро чӣ хел фаҳмидан мумкин?
— Яъне ки мешавад.
— Чунин ҷавоби шуморо чӣ хел фаҳмидан мумкин?
— Дар арафаи иҷрошавӣ, Рифъат Ҳоҷиевич.
— Ба қавли худатон: яъне, сол буд мешаваду плони шумо не.
Ҳамту-дия?
— Буд мешавад, Рифъат Ҳоҷиевич.
— Шумо медонед, ки гўшт, шир, равған, пашм аз куҷо пайдо мешавад?
— Наход надонам...
— Агар донед, Холиқов хиёнат кардааст ё ба манфиати халқу ватан кор кардааст?
— Ман...ман...
— Рафиқ Умарқулов, масъалаи аз партия хориҷ кардани Холиқов Абдуҳамидро кӣ ба шумо маслиҳат дод?
— Рифъат Ҳоҷиевич, касе маслиҳат надодааст. Мо дар асоси қарори маҷлиси пашкилоти ибтидоии партиявии геологӣ ба ин кор ҷуръат кардем.
— Ақаллан шумо номгўйи ордену медалҳои ин коммунисти фидоиро аз назар нагузаронидед?
— Дидам, рафиқ котиби якуми...
— Агар дида бошед, дидаву дониста, бо виҷдони партиявӣ ба чунин иқдом майл карда бошед, қоил нашудан мумкин нест.
— Охир, шумо дар болойи сарамон-ку, Риф...
— Вай сар ё калла, дурусттар кор фармоед. Наход шумо ҳамин қадар бепарво бошед, ки ҳамин хел коммунистони содиқ ва матиниродаро нашиносед. То як Холиқови дигар тайёр кардан чанд сол лозим?
— Дуруст, раф...
— Медонед, ки Холиқов ба унвони «Қаҳрамони меҳнати сосиалистӣ» пешниҳод шудааст?
— Медонам, раф...
— Агар донед, оқибаташ чӣ мешавад?
—...
— Шумо ҳуҷҷати ҳамин одама дида баромадед?
— Не, ҳа...
— Аризабозҳо дар ҳаққи ў чӣ навиштаанд?
— Моли Хоҷагии ёрирасонро нобуд кард.
— На самом деле?
— Сесад нафар гўсфанди изофа дорад.
— Ин қаҳрамонӣ нест? Вақте ки мо плони гўшту ширро буд карда наметавонем, гуфта ҳар рўз овоз баланд мекунем, моли Хоҷагии ёрирасонро ба чунин миқдор расонидани Холиқов қаҳрамонӣ нест?