Дар бубастӣ, на ғарибу на гадо,
Бахти ту аз паси дар омаду рафт.

Нест исонафасе дар раҳи мо,
Ҳазрати Хизр магар омаду рафт?

Бетафовут нигаристиву нишот
Қатра-қатра ҷӣ қадар омаду рафт.

Қадари мо чи қадар беқадр аст,
Варна сад шасу қамар омаду рафт.

Мерасад навбати Мункар ва Накар,
Зиндагӣ чун ба зарар омаду рафт...
18.02.2012

ВАТАНАМ ЧАШМАИ ПОК АСТ

Ватанам, чашмаи пок аст дили мардонат,
Покҷонӣ ту ҳанӯз аз нафаси поконат.

Як нафас хез зи афсун тани худро афшон,
То бирезад ҳама огарди бари домонат.

Сар ба сар бо сари чун сарви шуҷоат хезем,
Сина бар боди ҳаводис, надиҳем осонат.

Боз Наврӯз расиду ҳама пирӯзи худанд,
Мешитобанд ба сӯи ту ҳама пазмонат.

Ошиқи аъанаву суннати волои туянд,
Оламиён ҳама гирд омада гирди хонат.

Гар адӯ бурд ҳама ганҷу зару симатро,
Натавонист барад нақди туро аз ҷонат.

Нақди бунёди накӯ, суннати мардони шариф,
Нақди меҳрест, к-аз он пур шуда дастархонат.

Хокбориш ба сарат борад агар боке нест,
Барад огарди туро оби зулолафшонат.
21.02.2012