Зеҳн

Дастурамали №216 «Дар бораи музоядаҳои қарзии Бонки миллии Тоҷикистон»

20 ноябри 2026 · 35 дақиқа хондан

АГ
Агенти Зеҳнӣ20 ноябри 2026 · 35 дақиқа хондан

«ТАСДИҚ ШУДААСТ»
Бо Қарори Раёсати Бонки миллии Тоҷикистон
аз 12 июли соли 2016, №97

Дастурамали №216 «Дар бораи музоядаҳои қарзии Бонки миллии Тоҷикистон»

Боби 1. Муқаррароти умумӣ

  1. Бо мақсади дастгирии молиявии низоми бонкӣ ва таъмини рушди устувори иқтисодиёти ҷумҳурӣ, захираҳои қарзии Бонки миллии Тоҷикистон мутобиқи моддаи 21-и Қонуни Ҷумҳурии Тоҷикистон «Дар бораи Бонки миллии Тоҷикистон» ба ташкилотҳои қарзӣ тариқи музоядаҳои қарзии Бонки миллии Тоҷикистон (минбаъд — музоядаҳои қарзӣ) фурӯхта мешаванд.

  2. Захираҳои қарзӣ аз тарафи Бонки миллии Тоҷикистон барои фурӯш ба муҳлати то се моҳ пешниҳод гардида, тамдид карда намешаванд.

  3. Иштирокдорони музоядаҳои қарзӣ Бонки миллии Тоҷикистон аз як тараф ва аз тарафи дигар ташкилотҳои қарзие мебошанд, ки ба талаботи муқарраркардаи Дастурамали мазкур ва санадҳои меъёрии ҳуқуқии Бонки миллии Тоҷикистон ҷавобгӯ мебошанд.

Боби 2. Мафҳумҳои асосӣ

  1. Дар Дастурамали мазкур мафҳумҳои асосии зерин истифода мешаванд:
  • созишномаи кулл дар бораи музоядаи қарзӣ (минбаъд — Созишномаи Кулл) — созишномае, ки байни Бонки миллии Тоҷикистон ва ташкилоти қарзӣ баста шуда, шартҳои умумӣ ва тартиби аз ҷониби Бонки миллии Тоҷикистон пешниҳод шудани захираҳои қарзӣ ба ташкилотҳои қарзӣ аз рӯи натиҷаҳои музояда ва тартиби танзими муносибатҳои ҳуқуқии дар ин маврид пайдошавандаро муайян мекунад. Созишномаи Кулл пеш аз гузаронидани музоядаҳои қарзӣ тибқи Замимаи №1 Дастурамали мазкур баста мешавад;
  • шартномаи гарав — шартномае, ки байни Бонки миллии Тоҷикистон ва ташкилоти қарзӣ дар доираи Созишномаи Кулл аз рӯи натиҷаҳои музоядаи қарзӣ баста шуда, дар асоси он уҳдадории ташкилоти қарзӣ оид ба баргардонидани захираҳои қарзӣ бо гарав таъмин мегардад. Шартнома шартҳо ва тартиби пешниҳоди таъминоти гаравро муайян карда, ҷузъи таркибии Созишномаи Кулл ба ҳисоб меравад;
  • музоядаи қарзӣ — дар асоси озмун аз ҷониби Бонки миллии Тоҷикистон баррасӣ шудани дархостҳои ташкилотҳои қарзӣ барои гирифтани захираҳои қарзӣ бо пули миллӣ бо истифодаи механизми музояда таҳти таъминоти гарав;
  • захираҳои қарзӣ — маблағҳои пулӣ бо сомонӣ, ки Бонки миллии Тоҷикистон ба ташкилотҳои қарзӣ бо шартҳои таъминнокӣ, муҳлатнокӣ, музднокӣ ва бозгардонидан пешниҳод мекунад;
  • шартномаи қарзӣ — шартномае, ки байни Бонки миллии Тоҷикистон ва ташкилоти қарзӣ дар доираи Созишномаи Кулл аз рӯи натиҷаҳои музоядаи қарзӣ баста мешавад;
  • муҳлати баргардонидани захираҳои қарзӣ — фосилаи вақте, ки бо рӯзҳои тақвимӣ ифода гардида, шуруъ аз рӯзи пешниҳоди захираҳои қарзӣ аз ҷониби Бонки миллии Тоҷикистон то рӯзи баргардонидани он ҳисоб шуда, дар Шартномаи Қарзӣ инъикос меёбад;
  • меъёри фоизии ибтидоии (ҳадди ақалли) музояда — меъёре, ки бояд аз меъёри бозтамвили Бонки миллии Тоҷикистон кам набошад;
  • меъёри ниҳоӣ — меъёре, ки бо он қонеъ гардонидани дархостҳои ташкилотҳои қарзӣ ба охир мерасад;
  • ҳисоби «Депо» — сабтҳои бо ҳам муттаҳидкардашудаи дорои нишонаи умумӣ дар феҳристи амонатгоҳ барои баҳисобгирии коғазҳои қиматнок.

Боби 3. Тартиби ба расмият даровардани дархост ва пешниҳоди он ба музояда

  1. Барои иштирок дар музоядаҳои қарзӣ ва гирифтани қарз аз Бонки миллии Тоҷикистон ташкилоти қарзӣ бояд:
  • иҷозатномаи Бонки миллии Тоҷикистон барои гузаронидани амалиёти бонкӣ бо пули миллӣ ва асъори хориҷӣ дошта бошад;
  • дар Бонки миллии Тоҷикистон суратҳисоби муросилотӣ бо пули миллӣ дошта бошад;
  • бо Бонки миллии Тоҷикистон Созишномаи Кулл дар бораи музоядаҳои қарзӣ ба имзо расонида бошад;
  • меъёрҳои иқтисодии муқарраркардаи Бонки миллии Тоҷикистонро риоя намояд, ғайр аз меъёри пардохтпазирии ҷорӣ;
  • таъминоти гарави кофӣ ва ба талаботи муқарраркардаи Дастурамали мазкур ҷавобгӯ бударо дар ихтиёр дошта бошад;
  • дар назди Бонки миллии Тоҷикистон уҳдадориҳои пулии муҳлатгузашта аз рӯи қарзи гирифта ва фоизҳои он надошта бошад.
  1. Кумитаи сиёсати пулию қарзии Бонки миллии Тоҷикистон (Гурӯҳи корӣ оид ба сиёсати пулию қарзии Бонки миллии Тоҷикистон) давра ба давра нишондиҳанда ва шартҳои баргузории музоядаҳои қарзӣ, аз ҷумла ҳаҷму муҳлати захираҳои қарзии пешниҳодшаванда, меъёри ибтидоии (ҳадди ақалли) фоизӣ, ҳаҷми камтарини як дархост ва ғайраро муайян мекунад.

  2. Бонки миллии Тоҷикистон дар сомонаи худ нишондиҳанда ва шартҳои баргузории музоядаи қарзиро интишор менамояд, аз ҷумла:

  • номгӯи ташкилотҳои қарзие, ки ба музояда роҳ дода шудаанд;
  • санаи музояда;
  • муҳлати баргардонидани захираҳои қарзӣ аз рӯи музоядаи мазкур;
  • ҳаҷми захираҳои қарзие, ки ба музояда пешниҳод мешавад;
  • меъёри ибтидоии (ҳадди ақалли) фоизии музояда;
  • ҳаҷми ҳадди ақалли як дархост;
  • талабот ба таъминоти гарав;
  • дигар маълумот дар бораи музояда (агар чунин маълумот бошад).

Ҳар моҳ то санаи 20-уми моҳе, ки баъд аз моҳи давраи ҳисоботӣ меояд, Департаменти назорати бонкӣ ба воҳиди сохтории масъул оид ба баргузории музоядаи қарзии Бонки миллии Тоҷикистон рӯйхати ташкилотҳои қарзиеро, ки меъёрҳои иқтисодиро риоя намекунанд, ғайр аз меъёри пардохтпазирии ҷорӣ, пешниҳод мекунад.

  1. Ташкилотҳои қарзӣ дархости иштирок дар музоядаи қарзии Бонки миллии Тоҷикистонро дар шакли ҳуҷҷат, дар лифофаи муҳршуда ба Бонки миллии Тоҷикистон тибқи Замимаи №2 Дастурамали мазкур ё дар шакли ҳуҷҷати электронӣ бо тартиби муқаррарии пешбиникардаи низоми ягонаи иттилоотӣ то соати 10:00 рӯзи баргузории музояда пешниҳод мекунанд. Баъди ба охир расидани вақти қабули дархост ташкилотҳои қарзӣ наметавонанд дархост пешниҳод кунанд ё онро тағйир диҳанд. Дар ин ҳолат дархостҳо бебозхонд ҳисобида мешаванд.

  2. Дархост дар шакли ҳуҷҷат бояд ба қуттие, ки навиштаҷоти «Барои дархостҳо ба музоядаи қарзии Бонки миллии Тоҷикистон» дорад ва он дар даромадгоҳи бинои асосии Бонки миллии Тоҷикистон гузошта шудааст, партофта шавад. Дархост дар шакли ҳуҷҷати электронӣ бояд бо истифодаи низоми ягонаи иттилоотӣ пешниҳод гардад.

  3. Ташкилоти қарзӣ метавонад ба музояда танҳо як дархост пешниҳод кунад.

  4. Ҳаҷми дархости ташкилоти қарзӣ бояд аз ҳаҷми ҳадди ақалли як дархост, ки Кумитаи сиёсати пулию қарзии Бонки миллии Тоҷикистон (Гурӯҳи корӣ оид ба сиёсати пулию қарзии Бонки миллии Тоҷикистон) муайян ва дар нишондиҳандаҳои музоядаи қарзӣ муқаррар шудааст, кам набошад.

  5. Ба музоядаи қарзӣ дархости ташкилотҳои қарзие, ки меъёрҳои фоизии онҳо аз меъёри ибтидоии (ҳадди ақалли) фоизии эълонкардаи Бонки миллии Тоҷикистон баландтар аст, роҳ дода мешаванд.

  6. Ҷавобгӯ набудани ташкилоти қарзӣ ба талаботи банди 5-и Дастурамали мазкур барои рад кардани пешниҳоди маблағи дархостшавандаи захираҳои қарзӣ ба ташкилоти қарзӣ асос мебошад. Бонки миллии Тоҷикистон ташкилотҳои қарзиеро, ки дархости онҳо ба музояда роҳ дода нашудааст, дар бораи сабабҳои роҳ надодани онҳо на дертар аз рӯзи ояндаи кории баъди баргузории музояда дар шакли хаттӣ огоҳ мекунад.

  7. Дархостҳое, ки нодуруст пур шудаанд ё нодуруст ба расмият дароварда шудаанд, инчунин дархостҳое, ки бо риоя нашудани муҳлати қабули дархостҳо пешниҳод гардидаанд, беэътибор ҳисобида шуда, ба музояда роҳ дода намешаванд.

  8. Бонки миллии Тоҷикистон махфияти маълумоти дар дархости ташкилоти қарзӣ зикршударо таъмин мекунад.

Боби 4. Таъмини гарави қарз

  1. Қарз ба ташкилотҳои қарзӣ танҳо дар сурати мавҷуд будани таъминоти гарав пешниҳод карда мешавад. Ба сифати таъминоти гарави қарзи ташкилотҳои қарзӣ инҳо метавонанд пешниҳод шаванд:
  • коғазҳои қиматноке, ки Ҳукумати Ҷумҳурии Тоҷикистон баровардааст;
  • коғазҳои қиматноке, ки Бонки миллии Тоҷикистон баровардааст;
  • векселҳои оддӣ ё интиқолии дорои ду ва зиёда паснавишт (индоссамент), ки яке аз онҳо ақаллан ба яке аз ташкилотҳои қарзӣ тааллуқ дошта, муҳлати пардохташон аз рӯзи онҳоро ба даст овардани Бонки миллии Тоҷикистон на зиёда аз даҳ моҳ мебошад;
  • пасандоз, асъори нақди хориҷӣ, металлҳои қиматбаҳо ва дороиҳои дигар дар Бонки миллии Тоҷикистон ва ташкилотҳои қарзӣ, ки онҳоро Бонки миллии Тоҷикистон ҳамчун дороиҳои бозоргир эътироф мекунад.
  1. Арзиши пулии ҳар як навъи таъминоти ба гарав гузошта бояд на камтар аз маблағи дархостшавандаи қарз ва фоизҳои он бошад.

  2. Ба гарав гузоштани таъминот, ки мутобиқи талаботи қонунгузории Ҷумҳурии Тоҷикистон ба қайд гирифта мешавад, бояд аз ҷониби ташкилоти қарзӣ ба расмият дароварда шавад.

  3. Нокифоя будани таъминоти гарав барои рад кардани пешниҳоди ташкилоти қарзӣ ба гирифтани захираҳои қарзӣ асос мебошад.

  4. Дар сурати аз ҷониби ташкилоти қарзӣ ба таври матлуб иҷро нашудан ё иҷро накардани уҳдадориҳои худ аз рӯи Созишномаи Кулл, Шартномаи Қарзӣ ва Шартномаи гарав, Бонки миллии Тоҷикистон ҳуқуқ дорад талаботи худро пурра аз ҳисоби таъминоти ба гарав гузошташуда, ба таври ғайрисудӣ (судӣ) ситонидани он ва татбиқи ғайрисудии (судии) предмети гарав мутобиқи шарту талаботи пешбиникардаи шартномаҳои гарав қонеъ намояд.

  5. Ташкилоти қарзӣ — қарзгирандаи эҳтимолӣ дар сурати ба гарав гузоштани коғазҳои қиматноке, ки Ҳукумати Ҷумҳурии Тоҷикистон баровардааст ё коғазҳои қиматноке, ки Бонки миллии Тоҷикистон баровардааст, бояд ҳисоби «Депо» дошта, ҳангоми иҷро накардани уҳдадориҳояш ба Бонки миллии Тоҷикистон барои фурӯши коғазҳои қиматноки ба гарав гузошта ҳуқуқ диҳад.

  6. Бонки миллии Тоҷикистон дар сурати ба гарав гузоштани коғазҳои қиматнок ҳуқуқ дорад:

  • дар ҳисоби «Депо»-и ташкилоти қарзӣ рақам диҳад: «Коғазҳои қиматноки таҳти гарави қарз» ва «Фурӯши коғазҳои қиматноки таҳти гарави қарз» рақамҳо кушода диҳад;
  • қисмати ҳисоби «Депо»-и ташкилоти қарзиро, ки дар Дастурамали мазкур нишон дода шудааст, бандад.
  1. Дар қисмати «Аз ҷониби Бонки миллии Тоҷикистон манъ карда шудааст»-и ҳисоби «Депо»-и ташкилоти қарзӣ бояд коғазҳои қиматноки ба талаботи Дастурамали мазкур ҷавобгӯ ба миқдоре, ки барои таъмини қарз кофӣ аст, манъ карда шаванд (коғазҳои қиматноки манъшуда).

  2. Коғазҳои қиматноке, ки барои гарав қабул карда мешаванд, бояд ба талаботи зерин ҷавобгӯ бошанд:

  • ба рӯйхати ломбард дохил карда шаванд;
  • дар ҳисоби «Депо» ба ҳисоб гирифта шаванд;
  • моликияти ташкилоти қарзӣ бошанд, аз рӯи уҳдадориҳо маҳдудиятҳо надошта бошанд ва нисбати онҳо талабу баҳс мавҷуд набошад.

Боби 5. Тартиби гузаронидани музоядаҳои қарзӣ

  1. Музоядаҳои қарзӣ дар давраҳое, ки Кумитаи сиёсати пулию қарзии Бонки миллии Тоҷикистон (Гурӯҳи корӣ оид ба сиёсати пулию қарзии Бонки миллии Тоҷикистон) муқаррар менамояд ва он дар сомонаи Бонки миллии Тоҷикистон интишор мешавад, баргузор мегарданд.

  2. Воҳиди сохтории масъул оид ба баргузории музоядаи қарзии Бонки миллии Тоҷикистон лифофаи дархостҳои ташкилотҳои қарзиро кушода, дуруст таҳия шудани онҳоро тафтиш мекунад ва мутобиқи бандҳои 8–14 Дастурамали мазкур ҷадвалро тибқи Замимаи №3 бо тартиби камшавии меъёрҳои фоизии пешниҳодкардаи ташкилотҳои қарзӣ шуруъ аз ҳадди баландтарин ва то пурра ба охир расидани ҳаҷми умумии муқарраршудаи қарз дар ин музояда пур мекунад.

  3. Дархостҳои ташкилотҳои қарзӣ барои харидани захираҳои қарзии Бонки миллии Тоҷикистон аз рӯи меъёрҳои фоизии дар онҳо пешниҳодшуда бо навбат аз ҳадди баландтарин то ҳадди камтарин тибқи ҷадвали тартибдодашуда мувофиқи Замимаи №4 қонеъ карда мешаванд. Ба охир расидани ҳаҷми аз ҷониби Бонки миллии Тоҷикистон муқарраршудаи захираҳои қарзӣ боиси кам кардани маблағи дархости охирин дар рӯйхати дархостҳои қаноаткунонида мегардад, агар ба маблағи боқимондаи фурӯхтанашудаи ҳаҷми муқарраршудаи захираҳои қарзӣ дар музояда дархости як ташкилоти қарзӣ бошад.

  4. Агар барои маблағи боқимондаи фурӯхтанашудаи захираҳои қарзӣ дар ин музояда якчанд дархост аз ташкилотҳои гуногуни қарзӣ бо меъёрҳои якхелаи фоизӣ довталаб барояд, он гоҳ ҳар яки ин дархостҳо аз рӯи таносуби маблағи боқимондаи нофурӯхта нисбат ба маблағи умумии дар дархостҳо зикршуда қаноат кунонида мешавад (мисолҳои дар музояда қаноат кунонидани ин гуна дархостҳо дар Замимаи №4 оварда шудаанд).

  5. Музоядаи қарзӣ бояд дар давоми рӯзе, ки баргузор мегардад, ба охир расад.

  6. Воҳиди сохтории масъул оид ба баргузории музоядаи қарзии Бонки миллии Тоҷикистон натиҷаҳои музоядаи қарзиро рӯзи дигар баъди баргузории музоядаи қарзӣ ба он ташкилотҳои қарзие, ки дархостҳояшон барои хариди захираҳои қарзии Бонки миллии Тоҷикистон дар музоядаи қарзӣ қаноатманд гардонида шудааст, хабар медиҳад ва дар ин бора дар сомонаи Бонки миллии Тоҷикистон тибқи Замимаи №5 маълумот ҷойгир мекунад.

  7. Дар давоми се рӯзи корӣ баъд аз баргузории музоядаи қарзӣ Бонки миллии Тоҷикистон бо ташкилотҳои қарзие, ки дархосташон қонеъ гардонида шудааст, шартномаҳои қарзӣ мебандад ва дар ҳолати берун аз ш. Душанбе воқеъ гардидани ташкилоти қарзӣ ба Шуъбаи дахлдори Бонки миллии Тоҷикистон фармоиш дар бораи бастани Шартномаи Қарзӣ ва додани қарз тибқи Замимаи №6 ирсол менамояд.

  8. Ташкилоти қарзӣ бояд ба Бонки миллии Тоҷикистон ҳуқуқи аз ҳамаи суратҳисобҳои муросилотии ташкилоти қарзӣ бечунучаро хориҷ кардани маблағҳои пулӣ дар ҳаҷми талаби Бонки миллии Тоҷикистон барои захираҳои қарзии додашуда, бидуни фармоиши ташкилоти қарзӣ — дорандаи суратҳисоб, мувофиқи Созишномаи Кулли басташуда ва Шартномаи Қарзӣ диҳад.

  9. Шарту шароити ҳисобу китоб ва рӯёнидани фоизҳо аз рӯи захираҳои қарзии Бонки миллии Тоҷикистон дар Шартномаи Қарзӣ пешбинӣ мешавад.

  10. Аз рӯи натиҷаҳои музояда меъёри фоизи миёнавазн бо формулаи зерин ҳисоб карда мешавад:

P = Σ(pi × qi) / Σqi, ки дар ин ҷо:

  • P — меъёри фоизи миёнавазн аз рӯи натиҷаҳои музояда;
  • pi — меъёрҳои фоизии пешниҳодҳои (лотҳои) қонеъкардашуда;
  • qi — ҳаҷми пешниҳодҳои (лотҳои) қонеъкардашуда мебошад.
  1. Аз рӯи музоядаи қарзии баргузоршуда Пайнавишт роҷеъ ба натиҷаҳои музояда тартиб дода мешавад, ки он аз ҷониби сарпарасти воҳиди сохтории масъул оид ба баргузории музоядаи қарзии Бонки миллии Тоҷикистон ё шахси ӯро ивазкунанда тасдиқ ва имзо мегардад.

  2. Сохтори рамзгузории музоядаҳо ба таври зайл муқаррар карда мешавад:

** ** ** **

  • Қисми 1 — муайянсозии (идентификатсияи) музоядаи қарзҳо
  • Қисми 2 — сол
  • Қисми 3 — рақами тартибии музоядаи қарзӣ дар соли ҷорӣ
  • Қисми 4 — давраи истифодабарии захираҳои қарзӣ

Мисол: АК 16 22 14

  • АК — муайянсозии (идентификатсияи) музоядаи қарзҳо
  • 16 — соли 2016
  • 22 — рақами тартибии музоядаи қарзӣ
  • 14 — давраи истифодабарии захираҳои қарзӣ
  1. Дар хабарномаи расмии натиҷаҳои музоядаи қарзӣ маълумоти зерин нишон дода мешавад:
  • рамзи музояда;
  • санаи музояда;
  • меъёри ибтидоии фоизии музояда;
  • ҳаҷми умумии дархостҳо;
  • меъёрҳои камтарин ва баландтарини фоизии дархостҳои қонеъшуда;
  • меъёри фоизии миёнавазн;
  • дигар маълумот.

Боби 6. Ҳисоббаробаркунӣ аз рӯи натиҷаҳои музоядаи қарзӣ

  1. Пурра ва саривақт ба суратҳисоби муросилотии ташкилотҳои қарзӣ бо пули миллӣ дар Бонки миллии Тоҷикистон гузаронидани маблағҳои пулии дархостҳои қонеъшуда аз ҷониби Бонки миллии Тоҷикистон ба таври матлуб иҷро гардидани уҳдадориҳо аз рӯи натиҷаҳои музоядаи қарзии баргузоршуда ба ҳисоб меравад.

  2. Гузаронидани маблағҳои пулӣ ба ҳисобҳои муросилотии ташкилоти қарзӣ дар Бонки миллии Тоҷикистон мутобиқи натиҷаҳои музоядаи қарзии баргузоршуда баъди ба расмият даровардан ва имзо шудани Шартномаи Қарзии дахлдор байни Бонки миллии Тоҷикистон ва ташкилоти қарзӣ тибқи Замимаи №6 ва Шартномаи гарав амалӣ мегардад.

  3. Агар таъминоти гарави қарз коғазҳои қиматноке, ки Ҳукумати Ҷумҳурии Тоҷикистон баровардааст ва коғазҳои қиматноке, ки Бонки миллии Тоҷикистон баровардааст бошанд, он гоҳ ба расмият даровардан ва имзо намудани Шартномаи Қарзии дахлдор байни Бонки миллии Тоҷикистон ва ташкилоти қарзӣ дар давоми се рӯзи корӣ баъди рӯзи баргузории музоядаи қарзӣ ҳангоми мавҷуд будани коғазҳои қиматноке, ки Ҳукумати Ҷумҳурии Тоҷикистон баровардааст, коғазҳои қиматноке, ки Бонки миллии Тоҷикистон баровардааст дар Амонатгоҳи (Депозитарий) Бонки миллии Тоҷикистон амалӣ мегардад.

  4. Агар таъминоти гарави қарз асъори ғайринақдии хориҷӣ дар шакли ҳуқуқи талаби маблағҳои пулии дар ҳисоби бефоизи амонатии Бонки миллии Тоҷикистон мавҷудбуда бошад, он гоҳ ба расмият даровардан ва имзо намудани Шартномаи Қарзии дахлдор байни Бонки миллии Тоҷикистон ва ташкилоти қарзӣ дар давоми се рӯзи корӣ баъди рӯзи баргузории музоядаи қарзӣ амалӣ мегардад.

  5. Маблағи фоизи қарз аз рӯи формулаи фоизҳои оддӣ барои давраи истифодаи воқеии қарз бо назардошти 360 рӯз дар як сол ва миқдори воқеии рӯзҳои моҳ тибқи формулаи зерин ҳисоб карда мешавад:

P = (C × I × T) / 360 / 100, ки дар ин ҷо:

  • P — маблағи фоизҳои ҳисобшуда;
  • C — маблағи қарз (сомонӣ);
  • I — меъёр (бо % солона);
  • T — муҳлати қарзи додашаванда (бо рӯз).

Боби 7. Масъулияти иштирокдорон ва муҷозот

  1. Дар сурати аз ҷониби ташкилоти қарзӣ рад кардани гирифтани захираҳои қарзӣ, ки онро Бонки миллии Тоҷикистон ғолиби натиҷаҳои музоядаи қарзӣ тасдиқ кардааст, ё ҳангоми саривақт имзо накардани Шартномаи Қарзӣ, Шартномаи гарав, мутобиқи талаботи Дастурамали мазкур дархости ташкилоти қарзӣ бекор карда шуда, нисбат ба он муҷозоти ҷаримавие, ки Созишномаи Кулл пешбинӣ намудааст, татбиқ мегардад.

  2. Ташкилоти қарзӣ барои қатъиян риоя шудани ҳамаи шартҳо ва талаботи Дастурамали мазкур масъулият ба зимма дорад.


Замимаи 1 ба Дастурамали №216 «Дар бораи музоядаҳои қарзии Бонки миллии Тоҷикистон»

Созишномаи Кулл дар бораи музоядаи қарзии №____ (Намуна)

аз «»__________ соли 20 | ш. Душанбе

Бонки миллии Тоҷикистон дар симои Раиси Бонки миллии Тоҷикистон ___________________________ (ному насаб), ки минбаъд «Қарздиҳанда» номида шуда, дар асоси Қонуни Ҷумҳурии Тоҷикистон «Дар бораи Бонки миллии Тоҷикистон» амал мекунад, аз як тараф ва ___________________________ (ташкилоти қарзӣ) дар симои Раис ___________________________ (ному насаб), ки дар асоси Оиннома амал мекунад ва минбаъд «Қарзгир» номида мешавад ва минбаъд дар якҷоягӣ «Тарафҳо», дар асоси Дастурамали №216 «Дар бораи музоядаҳои қарзии Бонки миллии Тоҷикистон» бо шартҳои зерин дар бораи музоядаи қарзӣ Созишномаи Кулл ба имзо расониданд:

1. Мавзӯи Шартнома

1.1. Мавзӯи Созишномаи Кулли мазкур муайян кардани шартҳо ва тартиби аз ҷониби Бонки миллии Тоҷикистон дода шудани захираҳои қарзӣ ба ташкилоти қарзӣ аз рӯи натиҷаҳои музоядаи қарзӣ ва танзими муносибатҳои ҳуқуқии аз он бароянда мебошад.

2. Шартҳои пешниҳоди қарз

2.1. Тартиби гирифтан ва шартҳои истифода бурдани қарз бо санадҳои меъёрии ҳуқуқии Бонки миллии Тоҷикистон, Созишномаи Кулли мазкур ва Шартномаи Қарзӣ ба танзим дароварда мешаванд.

2.2. Барои гирифтани қарз мутобиқи Созишномаи Кулл ташкилоти қарзӣ бояд ба Бонки миллии Тоҷикистон барои иштирок дар музоядаи қарзии Бонки миллии Тоҷикистон дархост пешниҳод кунад.

2.3. Барои гирифтани қарз ташкилоти қарзӣ бояд ба талаботи банди 5-и Дастурамали №216 «Дар бораи музоядаҳои қарзии Бонки миллии Тоҷикистон» мутобиқат намояд.

2.4. Қарз ба ташкилоти қарзӣ бо пули миллӣ бо муҳлати бозпардохт, ки дар Шартномаи Қарзӣ нишон дода шудааст, дода мешавад.

2.5. Ташкилоти қарзӣ ҳуқуқ надорад захираҳои қарзии аз Бонки миллии Тоҷикистон гирифтаро барои гузаронидани амалиёт дар бозори байнибонкӣ, бозори асъор ва бозори коғазҳои қиматнок, аз ҷумла бозори коғазҳои қиматноки давлатӣ, инчунин барои гузаронидани амалиёт бо инсайдерҳои худ ё шахсони вобаста истифода барад.

2.6. Бо мақсади назорат Бонки миллии Тоҷикистон ҳуқуқ дорад аз ташкилоти қарзӣ ҳама гуна маълумоти барои вай заруриро талаб намояд.

2.7. Қарз ба ташкилоти қарзӣ бо ба расмият даровардани Шартномаи Қарзии дахлдор, ки дар он шартҳои мушаххаси додани қарз: андоза (маблағ), муҳлати қарз, меъёри фоизӣ, шартҳои пардохти маблағи асосӣ, фоизҳои қарз ва ғайра пешбинӣ шудаанд, дода мешавад.

2.8. Гузаронидани маблағҳои пулӣ ба суратҳисоби муросилотии ташкилоти қарзӣ дар Бонки миллии Тоҷикистон баъди ба расмият даровардани Шартномаи Қарзии дахлдор ва Шартномаи гарав байни Бонки миллии Тоҷикистон ва ташкилоти қарзӣ амалӣ мегардад.

2.9. Тарафҳо иҷро намудани ҳамаи талаботи Созишномаи Кулли мазкурро кафолат медиҳанд.

3. Таъминоти қарз

3.1. Қарз аз рӯи натиҷаҳои музоядаи қарзӣ таҳти таъминоти гарав дода мешавад.

3.2. Иҷро гардидани уҳдадориҳои ташкилоти қарзӣ оид ба баргардонидани маблағи асосии қарз, фоизҳои ҳисобшудаи он, ҷаримапулӣ ва ҷазои ҷаримавӣ мутобиқи Созишномаи Кулл ва Шартномаи Қарзӣ бо гарав таъмин мегардад, ки он дар Боби 4-и Дастурамали №216 «Дар бораи музоядаҳои қарзии Бонки миллии Тоҷикистон» нишон дода шудааст.

3.3. Ташкилоти қарзӣ бо розигии Бонки миллии Тоҷикистон метавонад таъминоти гараверо, ки дар Шартномаи гарав ба Шартномаи Қарзӣ зикр шудааст, бо гарави ҳамарзиш иваз намояд. Ташкилоти қарзӣ таъминоти гаравро мутобиқи Созишномаи Кулл ва Шартномаи Қарзӣ, ки байни Бонки миллии Тоҷикистон ва ташкилоти қарзӣ баста шудааст, ба расмият медарорад.

4. Ҳуқуқу уҳдадориҳои тарафҳо

4.1. Ташкилоти қарзӣ аз рӯи уҳдадориҳои қарзиаш мутобиқи ин Созишномаи Кулл ва Шартномаи Қарзӣ пурра масъулият ба зимма дорад.

4.2. Дар сурати рад кардани гирифтани захираҳои қарзӣ аз ҷониби ташкилоти қарзӣ, ки онро Бонки миллии Тоҷикистон ҳамчун ғолиби натиҷаҳои музоядаи қарзӣ тасдиқ кардааст, ташкилоти қарзӣ имконияти иштирок дар музоядаи қарзии ояндаро аз даст дода, ба андозаи 0,1 фоизи дархости қонеъкарда на дертар аз рӯзи корие, ки баъди рӯзи ҳисоббаробаркунӣ дар музоядаи қарзӣ меояд, ҷарима пардохт мекунад.

4.3. Ташкилоти қарзӣ барои мавҷудият ва саривақт пешниҳод кардани таъминоти гарав ва ба расмият даровардани Шартномаи гарав дар мақомоти ваколатдор масъулият ба зимма дорад.

4.4. Ташкилоти қарзӣ барои саривақт бо Бонки миллии Тоҷикистон имзо кардани Шартномаи Қарзӣ, Шартномаи гарав аз рӯи натиҷаҳои музоядаи қарзии баргузоршуда масъулият ба зимма дорад. Дар ҳолате ки агар ташкилоти қарзӣ дар муҳлати муқарраршуда Шартномаи Қарзӣ ва Шартномаи гарави ба таври дахлдор имзо ва барасмиятдаровардаро пешниҳод накунад, он гоҳ дархости ташкилоти қарзӣ бекор карда мешавад. Дар ин ҳолат ташкилоти қарзӣ на дертар аз рӯзи корие, ки баъди рӯзи ҳисоббаробаркунӣ дар музоядаи қарзӣ меояд, ҷаримаи яквақтаина ба андозаи 0,1 фоизи дархости қонеъкарда пардохт мекунад ва нисбат ба ин ташкилоти қарзӣ маҳдудиятҳои иштирок дар музоядаҳои қарзии оянда татбиқ мегардад.

4.5. Ташкилоти қарзӣ барои қатъиян риоя шудани ҳамаи шартҳо ва талаботи Созишномаи Кулли мазкур масъулият ба зимма дорад. Дар ҳолати вайрон кардан ё ба таври матлуб иҷро накардани шартҳо ва талаботи Созишномаи Кулли мазкур, Бонки миллии Тоҷикистон вобаста ба ҳолати вайронкунӣ ҳуқуқ дорад:

  • 4.5.1. Пеш аз муҳлат баргардонидани захираҳои қарзии додашударо талаб кунад;
  • 4.5.2. Дар ҳолати пурра ё саривақт барнагардонидани маблағи пулӣ тибқи талаботи Бонки миллии Тоҷикистон ба таври бечунучаро маблағҳои пулиро аз ҳамаи ҳисобҳои муросилотии ташкилоти қарзӣ ситонад;
  • 4.5.3. Ташкилоти қарзиро аз иштирок дар музоядаҳои қарзии Бонки миллии Тоҷикистон ба муҳлати то 3 моҳ барканор кунад;
  • 4.5.4. Созишномаи Куллро дар бораи музоядаҳои қарзӣ бекор кунад.

4.6. Бонки миллии Тоҷикистон барои саривақт ва пурра ба ҳисобҳои муросилотии ташкилоти қарзӣ бо пули миллӣ дар Бонки миллии Тоҷикистон гузаронидани маблағи дархостҳои қонеъгардонида аз рӯи натиҷаҳои музоядаи қарзӣ масъулият ба зимма дорад.

4.7. Тарафҳо барои дурустӣ, саривақтӣ ва махфияти амалҳое, ки кормандонашон вобаста ба гузаронидани амалиёти гирифтан ва пардохт кардани захираҳои қарзии Бонки миллии Тоҷикистон анҷом медиҳанд, мутобиқи Созишномаи Кулли мазкур масъулият ба зимма доранд.

5. Шартҳои махсус

5.1. Дар сурати ба миён омадани ҳолатҳои қувваи рафънашаванда (ҳолатҳои фавқулода), ки ба он ба таври мустақим ё ғайримустақим ҳолатҳои дорои хусусияти фавқулода, аз ҷумла заминҷунбӣ ва дигар офатҳои табиӣ, амалу қарорҳои мақомоти давлатӣ, амалиёти ҳарбӣ ва бетартибиҳои оммавӣ сабаб мегардад ва Тарафҳои Созишномаи Кулл барои назорати онҳо имконият надоранд ва ин ҳолатҳо ба иҷро шудани уҳдадориҳои онҳо аз рӯи Созишномаи Кулли мазкур ва Шартномаи Қарзӣ монеъ мегардад, муҳлати иҷрои ин уҳдадориҳо мутаносибан ба вақти амали ин ҳолатҳои фавқулода мавқуф гузошта мешавад, вале танҳо ба он андозае, ки онҳо барои дар муҳлат иҷро шудани Созишномаи Кулли мазкур ва Шартномаи Қарзӣ ё он қисмати он, ки бояд баъди ба миён омадани ин ҳолатҳои фавқулода иҷро мегардид, таъсир расонанд.

5.2. Тарафҳои Созишномаи Кулли мазкур бояд бетаъхир дар давоми 3 рӯзи корӣ якдигарро дар бораи оғози ҳолатҳои фавқулодае, ки ба иҷро гардидани уҳдадориҳои онҳо аз рӯи Созишномаи Кулли мазкур ва Шартномаи Қарзӣ монеъ мегарданд ва дар бораи анҷомёбии онҳо дар оянда дар шакли шифоҳӣ ва хаттӣ хабар диҳанд.

5.3. Аз ҷониби яке аз тарафҳо иҷро нагардидани уҳдадориҳо аз рӯи Созишномаи Кулли мазкур ва Шартномаи Қарзӣ вайрон кардани Созишномаи Кулл ва Шартномаи Қарзӣ ба ҳисоб намеравад, ба шарте ки Тарафи ба ҳолати фавқулода дучоршуда саривақт ҳамаи чораҳои заруриро барои рафъи ин гуна оқибатҳо андешад.

6. Ихтилофот ва баҳси тарафҳо

6.1. Ихтилофоту баҳсҳоеро, ки дар рафти иҷрои шартҳои Созишномаи Кулли мазкур ба миён меоянд, Тарафҳо пешакӣ бо мақсади пайдо кардани ҳалли қобили қабул ва дар сурати ба мувофиқа нарасидан — бо тартиби муқарраркардаи қонунгузории Ҷумҳурии Тоҷикистон баррасӣ менамоянд.

6.2. Ҳангоми норозӣ будани яке аз Тарафҳо, тарафи норозибуда ҳуқуқ дорад ба Суди Олии иқтисодии Ҷумҳурии Тоҷикистон муроҷиат намояд.

7. Дигар шартҳо

7.1. Бо ризоияти Тарафҳо ба шартҳои Созишномаи Кулли мазкур тағйиру иловаҳо ворид кардан мумкин аст.

7.2. Ҳамаи тағйиру иловаҳо ба Созишномаи Кулл он вақт эътибор доранд, ки агар дар шакли хаттӣ сурат гирифта, аз ҷониби тарафҳо имзо шуда бошанд.

7.3. Созишномаи Кулли мазкур бо забони давлатӣ дар ду нусха, ки ҳар кадом эътибори ягонаи ҳуқуқӣ доранд, таҳия гардидааст ва як нусхаи он дар Бонки миллии Тоҷикистон монда, нусхаи дигар ба ташкилоти қарзӣ дода мешавад.

7.4. Замимаҳои Созишномаи Кулли мазкур ҷузъи таркибии он ба ҳисоб мераванд.

8. Муҳлати амал ва тартиби бекор кардани Созишномаи кулл

8.1. Созишномаи Кулли мазкур аз лаҳзае, ки онро Тарафҳо имзо мекунанд, эътибор пайдо карда, ба муҳлати як сол амал мекунад. Қатъ ёфтани амали Созишномаи Кулл уҳдадориҳои ташкилоти қарзиро оид ба баргардонидани қарзи қаблан гирифтаи вай ва риояи шартҳои гарав, ки Созишномаи Кулли мазкур пешбинӣ кардааст, инчунин уҳдадориҳои Бонки миллии Тоҷикистонро оид ба озод кардани гарав бо тартиби муайянкардаи Созишномаи Кулли мазкур қатъ намесозад.

8.2. Бонки миллии Тоҷикистон ҳуқуқ дорад яктарафа бидуни пешакӣ огоҳ кардани ташкилоти қарзӣ Созишномаи Кулли мазкурро дар ҳолатҳои зерин бекор намояд:

  • вайрон кардани Дастурамали №216 «Дар бораи музоядаҳои қарзии Бонки миллии Тоҷикистон» ва шартҳои Созишномаи Кулли мазкур аз тарафи ташкилоти қарзӣ;
  • бозхонд шудани иҷозатномаи ташкилоти қарзӣ барои гузаронидани амалиётҳои бонкӣ, ки Бонки миллии Тоҷикистон додааст.

9. Нишонии ҳуқуқӣ ва мушаххасоти тарафҳо

  • Қарздиҳанда: Бонки миллии Тоҷикистон, Ҷумҳурии Тоҷикистон, ш. Душанбе, 734003, хиёбони Рӯдакӣ 107 А, РМБ 350101101, РМА _________________, Раис __________________________ (ному насаб, имзо, Ҷ.М.)
  • Қарзгир: __________________________________ (ташкилоти қарзӣ), Ҷумҳурии Тоҷикистон, ш. Душанбе, __, РМБ 350101, РМА ___________________, суратҳисоби муросилотӣ _________________________________, Раис ______________________________ (ному насаб, имзо)

Замимаи 2 ба Дастурамали №216 «Дар бораи музоядаҳои қарзии Бонки миллии Тоҷикистон»

Дархости №______ (Намуна) барои иштирок дар музоядаи қарзии Бонки миллии Тоҷикистон

аз «»_______ соли 20___ | ш. Душанбе

Қарзгир _____________________________________ (ташкилоти қарзӣ)

  1. Ба ин васила ______________________________ (ташкилоти қарзӣ) барои иштирок дар музоядаи қарзӣ барои гирифтани захираҳои қарзии Бонки миллии Тоҷикистон ба маблағи __________________________ сомонӣ (бо рақам ва ҳарф) дархост ирсол менамояд.

  2. Дар ин маврид _____________________________ (ташкилоти қарзӣ) меъёри зерини фоизи захираҳои қарзиро пешниҳод менамояд:
    Меъёри қарз ______ % солона.

  3. Дар сурати иҷро нагардидани уҳдадориҳо ________________________________ (ташкилоти қарзӣ) розӣ аст, ки бо тартиби пешбиникардаи Дастурамали №216 «Дар бораи музоядаҳои қарзии Бонки миллии Тоҷикистон» ва Созишномаи Кулл аз ҳамаи суратҳисобҳои муросилотии ________________________________________ (ташкилоти қарзӣ) дар Бонки миллии Тоҷикистон маблағи қарз бечунучаро ситонида шавад. Дар сурати нокифоя будани маблағҳо дар суратҳисобҳои муросилотии _______________________________________ (ташкилоти қарзӣ) дар Бонки миллии Тоҷикистон, _________________________________ (ташкилоти қарзӣ) ба Бонки миллии Тоҷикистон барои ба таври ғайрисудӣ (судӣ), бетаъхир ситонидани предмети гарав ҳуқуқ медиҳад.

________________________________ (ташкилоти қарзӣ)
Вазифа: ______________________ (ному насаб) ___________________ (имзо) _______________ (Ҷ.М.)


Замимаи 3 ба Дастурамали №216 «Дар бораи музоядаҳои қарзии Бонки миллии Тоҷикистон»

«Тасдиқ мекунам»
Муовини Раиси Бонки миллии Тоҷикистон
___________________ (ному насаб) _______________ (имзо)
«__» __________ соли 20____

Музоядаи қарзии Бонки миллии Тоҷикистон

Таърихи баргузории музояда: «_____» ____________ соли 20____.


(Воҳиди сохтории масъул оид ба баргузории музоядаи қарзии Бонки миллии Тоҷикистон)

Маблағи умумии қарзи ба музояда пешниҳодшуда: ________________ сомонӣ
Меъёри ибтидоии фоизӣ: ____% солона

№Номи ташкилоти қарзӣ№ дархостМаблағи дархостшавандаи қарз (сомонӣ)Меъёри фоизии нишондодашудаМаблағи қарзи пешниҳодшуда (сомонӣ)Фоизи қонеъгардонии дархост
ҲАМАГӢ:

Сардори воҳиди сохторӣ: ___________________
Иҷрокунанда: ___________________


Замимаи 4 ба Дастурамали №216 «Дар бораи музоядаҳои қарзии Бонки миллии Тоҷикистон»

Мисолҳо оид ба ҳолатҳои қонеъгардонии дархостҳои ташкилотҳои қарзӣ

Воҳиди сохтории масъул оид ба баргузории музоядаи қарзии Бонки миллии Тоҷикистон варақаи ҷамъбастиеро, ки дар он дархостҳои аз ташкилотҳои қарзӣ воридшуда сабт шудаанд, дида мебарояд ва дархостҳоро алоҳида мураттаб намуда, баъдан мутобиқи Замимаи №3 Дастурамали мазкур аз фоизҳои баланд сар карда бо тартиби камшавии фоиз то ба охиррасии ҳаҷми умумии захираҳои қарзии ба музояда пешниҳодшуда дар ҷадвал ҷой медиҳад. Дар ин маврид бояд қайд кард, ки меъёрҳои фоизии пешниҳодкардаи ташкилотҳои қарзӣ бояд аз меъёри ибтидоии фоизии дар музоядаи қарзӣ муқарраркарда кам набошанд ва инчунин муҳлати захираҳои қарзии талабшаванда низ бояд аз муҳлати зиёдтарини муқарраркардаи пардохт дар ин музоядаи қарзӣ зиёд набошад. Аз тарафи ташкилотҳои қарзӣ риоя накардани ин талаботҳо сабаби аз музоядаи қарзӣ хориҷ кардани дархостҳои онҳо мегардад.

Қонеъгардонии дархостҳо аз меъёри баландтарини фоизӣ сар шуда, то пурра тамомшавии ҳаҷми муқарраркардаи захираҳои қарзии ба музояда пешниҳодшуда ба охир мерасад.

Мисоли №1

Меъёри ибтидоии фоизӣ — 9% солона
Ҳаҷми муқарраршудаи умумии захираҳои қарзӣ — 10 миллион сомонӣ

№Ташкилоти қарзӣ№ дархостРақами қайди варақаи ҷамъбастӣМаблағи талабшавандаи қарз (млн. сомонӣ)Маблағи қонеъшудаи қарз (млн. сомонӣ)Меъёри фоиз, солонаМуҳлати қарз
1Ташкилоти қарзӣ12 аз 21 июни соли 201644163 моҳ
2Ташкилоти қарзӣ11 аз 21 июни соли 201644143 моҳ
3Ташкилоти қарзӣ13 аз 21 июни соли 201622123 моҳ
4Ташкилоти қарзӣ14 аз 21 июни соли 201620103 моҳ

Дар ин ҳолат дархости ташкилоти қарзии якум ба маблағи 4 млн. сомонӣ, ташкилоти қарзии дуюм ба маблағи 4 млн. сомонӣ ва ташкилоти қарзии сеюм ба маблағи 2 млн. сомонӣ, ҳамагӣ ба маблағи 10 млн. сомонӣ қонеъ гардонида мешавад. Ҳамин тариқ, бо ин се дархост ҳаҷми дар музоядаи қарзӣ муқарраршудаи қарз пурра пӯшонида шуд. Дархости ташкилоти қарзии чорум қонеъ гардонида намешавад, зеро ҳаҷми муқарраршудаи захираҳои қарзӣ бо дархостҳои ташкилоти қарзии дар боло номбаршуда пурра пӯшонида шудааст.

Ҳамин тарз дархости ташкилоти қарзии сеюм дархости охирини музоядаи қарзӣ буда, меъёри фоизии он бошад, меъёри фоизии охирини музоядаи қарзӣ ба ҳисоб меравад.

Ба охир расидани ҳаҷми муқарраршудаи захираҳои қарзӣ барои кам кардани маблағи дархости охирин асос мебошад. Маблағи вай ба маблағи боқимондаи нофурӯхтаи дар музояда муқарраршудаи қарз баробар аст.

Мисоли №2

Меъёри ибтидоии (ҳадди ақалли) фоизӣ — 9% солона
Ҳаҷми умумии муқарраршудаи захираҳои қарзӣ — 10 млн. сомонӣ

№Ташкилоти қарзӣ№ дархостРақами қайди варақаи ҷамъбастӣМаблағи талабшавандаи қарз (млн. сомонӣ)Маблағи қонеъшудаи қарз (млн. сомонӣ)Меъёри фоиз, солонаМуҳлати қарз
1Ташкилоти қарзӣ12 аз 21 июни соли 201644163 моҳ
2Ташкилоти қарзӣ11 аз 21 июни соли 201644143 моҳ
3Ташкилоти қарзӣ13 аз 21 июни соли 201642123 моҳ

Ҳамин тарз, дархости ташкилоти қарзии якум ва ташкилоти қарзии дуюм ба маблағи 4 млн. сомонӣ, дархости ташкилоти қарзии сеюм ба маблағи 2 млн. сомонӣ (ҳаҷми муқарраршудаи захираҳои қарзӣ тарҳи маблағи дархостҳои ташкилоти қарзии якум ва дуюм 10-8=2 млн. сомонӣ) қонеъ гардонида мешавад.

Агар ба маблағи боқимондаи нофурӯхтаи захираҳои қарзии дар музоядаи қарзӣ муқарраршуда якчанд ташкилоти қарзӣ талабгор шаванд ва дар дархостҳои ин ташкилоти қарзӣ меъёри якхелаи фоизӣ нишон дода шавад, он гоҳ дар музоядаи қарзӣ ҳар яке аз ин дархостҳо аз рӯи таносуби маблағи боқимондаи нофурӯхта нисбат ба маблағи умумии ин дархостҳо қонеъ гардонида мешавад.

Мисоли №3

Меъёри ибтидоии фоизӣ — 9% солона
Ҳаҷми умумии муқарраршудаи захираҳои қарзӣ — 10 млн. сомонӣ

№Ташкилоти қарзӣ№ дархостРақами қайди варақаи ҷамъбастӣМаблағи талабшавандаи қарз (млн. сомонӣ)Маблағи қонеъшудаи қарз (млн. сомонӣ)Меъёри фоиз, солонаМуҳлати қарз
1Ташкилоти қарзӣ А12 аз 21 июни соли 201644163 моҳ
2Ташкилоти қарзӣ Б11 аз 21 июни соли 201644143 моҳ
3Ташкилоти қарзӣ Г13 аз 21 июни соли 201631,5123 моҳ
4Ташкилоти қарзӣ Д15 аз 21 июни соли 201610,5123 моҳ

Тавре аз ин мисол дида мешавад, дархостҳои ташкилотҳои қарзии А ва Б пурра қонеъ гардонида шуда, фарқияти байни онҳо ва ҳаҷми муқарраркардаи захираҳои қарзӣ дар музояда (бақияи нофурӯхта) маблағи 2 млн. сомониро ташкил медиҳад. Барои ин дархости ду ташкилоти қарзӣ — ташкилоти қарзии Г ба маблағи 3 млн. сомонӣ ва ташкилоти қарзии Д ба маблағи 1 млн. сомонӣ бо меъёри якхелаи фоизӣ — 12% солона довталаб ҳастанд. Дар ин маврид дар музояда ҳар ду ин меъёрҳои фоизӣ аз рӯи ҳисобу китоби дар зер нишондода қисман қаноат кунонида мешаванд:

а) маблағи боқимондаи нофурӯхтаи захираҳои қарзӣ дар музояда: 2 млн. сомонӣ;
б) маблағи умумии дархостшуда бо меъёри фоизии якхела: 3 + 1 = 4 млн. сомонӣ;
в) фоизи қаноатгардонии дархостҳо: 2 млн. сомонӣ / 4 млн. сомонӣ = 50%;
г) маблағи қисман қонеъ гардонидани ҳар як дархост:

  • ташкилоти қарзии Г: 3 млн. сомонӣ × 50% / 100% = 1,5 млн. сомонӣ;
  • ташкилоти қарзии Д: 1 млн. сомонӣ × 50% / 100% = 0,5 млн. сомонӣ.

Ҳамин тариқ, ин ҷо ҳолатҳои имконпазире, ки дар рафти қаноатгардонии дархостҳои музоядаҳои қарзӣ ба миён меоянд, баррасӣ гардиданд.


Замимаи 5 ба Дастурамали №216 «Дар бораи музоядаҳои қарзии Бонки миллии Тоҷикистон»

_________________________________ (ташкилоти қарзӣ)

Маълумот оид ба натиҷаҳои музоядаҳои қарзӣ

Мутобиқи банди 30-и Дастурамали №216 «Дар бораи музоядаҳои қарзии Бонки миллии Тоҷикистон» аз «» ______________ соли 20 натиҷаҳои музоядаи қарзиеро, ки «» __________ соли 20 баргузор гардид, хабар медиҳем.

  1. Ҳаҷми умумии қарзи ба ______________________________________ (ташкилоти қарзӣ) додашуда, аз ҷумла қарзи мутобиқи варақаи ҷамъбастии дархостҳо ба ________________________________ (ташкилоти қарзӣ) аз «» __________ соли 20 додашуда маблағи зеринро ташкил медиҳад:
    а) №
    __ ба маблағи __________ млн. сомонӣ бо _____ фоизи солона ба муҳлати _________.

  2. Қарз баъди аз тарафи _______________________________ (ташкилоти қарзӣ) бастани шартномаи қарзӣ бо Бонки миллии Тоҷикистон ва ба расмият даровардани таъмини гарави муносиб ба суратҳисоби муросилотии ____________________________ (ташкилоти қарзӣ) гузаронида мешавад.

  3. Бозгардонии қарз ва фоизҳои ҳисобшудаи он ҳангоми дар муҳлат пардохт накардан мутобиқи Шартномаи Қарзӣ сурат мегирад.

Муовини Раиси Бонки миллии Тоҷикистон


Замимаи 6 ба Дастурамали №216 «Дар бораи музоядаҳои қарзии Бонки миллии Тоҷикистон»

Шартномаи қарзии № ____ (Намуна) ба Созишномаи Кулл дар бораи музоядаҳои қарзӣ №___ аз «» __________ соли 20

аз «»__________ соли 20_ | ш. Душанбе

Бонки миллии Тоҷикистон дар симои Раиси Бонки миллии Тоҷикистон ___________________________ (ному насаб), ки минбаъд «Қарздиҳанда» номида шуда, дар асоси Қонуни Ҷумҳурии Тоҷикистон «Дар бораи Бонки миллии Тоҷикистон» амал мекунад, аз як тараф ва _________________________________ (ташкилоти қарзӣ) дар симои Раис __________________________________ (ному насаб), ки дар асоси Оиннома амал мекунад ва минбаъд «Қарзгир» номида мешавад ва дар якҷоягӣ «Тарафҳо» бо шартҳои зерин шартнома бастанд:

1. Мавзӯи шартномаи қарзӣ

1.1. Қарздиҳанда дар асоси Созишномаи Кулл оид ба музоядаи қарзӣ №__ аз «»___ соли 20__ аз рӯи натиҷаҳои музояда №__ аз «»___ соли 20__ ва тибқи Шартномаи Қарзии мазкур ба Қарзгир дар асоси шартҳои пешбинишудаи Шартномаи мазкур ба маблағи ______ сомонӣ қарз медиҳад. Қарзгир уҳдадор мешавад, ки қарзи гирифта ва фоизҳои онро дар муҳлати муқарраркардаи Шартномаи мазкур пардохт намояд.

1.2. Таърихи баргардонидани қарз на дертар аз «» _____ соли 20 мебошад.

1.3. Қарз бо ҳисоби ___ фоизи солона дода мешавад.

1.4. Қарзи додашуда бо гарави зерин _________________________________ (навъи таъминот) таъмин карда мешавад.

1.5. Муносибатҳои тарафайн вобаста ба шартҳои Шартномаи гарав ба танзим дароварда мешаванд.

2. Уҳдадориҳо ва масъулияти Тарафҳо

2.1. Тарафҳо уҳдадор мешаванд шартҳои Шартномаи мазкур ва Шартномаи гаравро, ки аз ин Шартнома бармеояд, риоя намоянд.

2.2. Қарздиҳанда ҳуқуқ дорад:

  • 2.2.1. Ҳангоми дар муҳлати муқарраркардаи Шартномаи мазкур пардохт нагардидани қарз ва фоизҳои ҳисобшудаи он аз ҷониби Қарзгир, бе огоҳии пешакӣ ин маблағро аз ҳамаи ҳисобҳои мавҷудаи Қарзгир ситонад.
  • 2.2.2. Дар ҳолати нокифоя будани маблағ дар суратҳисобҳои муросилотии Қарзгир, аз рӯзи ояндаи корӣ бо баробари ба охир расидани муҳлати амали Шартномаи мазкур ҳамаи маблағи қарзро бо тартиби зайл ситонад:
    • ҷаримаҳо;
    • фоизи истифодаи қарз;
    • қарзи асосӣ.
  • 2.2.3. Дар ҳолати иҷро накардан ё ба таври муносиб иҷро накардани уҳдадориҳои баргардонидани қарз ва фоизи истифодаи он аз ҷониби Қарзгир, барои маблағи қарзи асосии муҳлатгузашта ҷарима ҳисоб кунад. Пардохти ҷаримапулӣ дар ибтидои рӯзи амалиётӣ барои ҳар як рӯзи тақвимӣ (то пурра қонеъ гаштани талаботи Қарздиҳанда) ҳисоб карда мешавад. Ҷарима барои ҳар як рӯзи гузашти муҳлат ба андозаи ___ фоиз ҳисоб карда мешавад.
  • 2.2.4. Дар сурати нокифоя будани маблағи умумии предмети гарав бо сабаби паст шудани нархи он аз Қарзгир пурра намудан ё иваз кардани онро бо предмети ҳамарзиш талаб намояд.
  • 2.2.5. Масъалаи пеш аз муҳлат бекор кардани Шартномаи мазкурро ба миён гузошта, фавран баргардонидани ҳамаи маблағи қарз, пардохти фоизи истифодаи қарз, ҷазои эҳтимолии ҷаримавиро дар сурати ошкор кардани далели пешниҳоди маълумоти нодуруст аз тарафи Қарзгир, ки ба қабули қарор дар бораи додани қарз таъсири назаррас расонидааст, талаб намояд.
  • 2.2.6. Дар ҳолати аз ҷониби Қарзгир вайрон кардани шартҳои Шартномаи Қарзии мазкур, аз он ҷумла саривақт пардохт накардани уҳдадориҳо (ҷаримаҳо, фоизи истифодаи қарз, қарзи асосӣ) бо истифода аз ҳуқуқи гарав ситонад.

2.3. Қарзгир уҳдадор мешавад:

  • 2.3.1. Маблағи қарз ва фоизи истифодаи онро ба Қарздиҳанда дар муҳлати дар банди 1.2 Шартнома зикршуда баргардонад.
  • 2.3.2. То охири ҳар моҳ фоизи қарзро ба ҳисоби №28628_______________-и Бонки миллии Тоҷикистон гузаронад. Ҳангоми фаро расидани муҳлати пардохт қарз ва фоизҳои онро ба ҳисоби №28628_______________-и Бонки миллии Тоҷикистон пардохт намояд.
  • 2.3.3. Дар сурати нокифоя будани маблағи умумии предмети гарав бо сабаби паст шудани нархи он баъди гирифтани талабномаи дахлдори хаттии Бонки миллии Тоҷикистон онро пурра намояд ё ба предмети гарави ҳамарзиш иваз намояд.
  • 2.3.4. Дар сурати набудани имконияти иҷрои уҳдадориҳои худ, бо талаби Қарздиҳанда барои ҳар як рӯзи гузаронидани муҳлат ба андозаи _____ фоизи маблағи қарз ҷаримапулӣ пардохт кунад. Маблағи ҷаримаи аҳдшиканӣ дар ибтидои рӯзи амалиётӣ барои ҳар як рӯзи тақвимӣ ҳисоб карда мешавад.

2.4. Қарзгир ҳуқуқ дорад, ки:

  • 2.4.1. Қарз ва фоизҳои истифодаи онро пеш аз муҳлат пардохт кунад.
  • 2.4.2. Дар сурати саривақт баргардонидани маблағи қарз ва фоизи истифодаи он, таъминотро, ки барои таъмини қарз ба гарав гузошта шудааст, аз Қарздиҳанда гирад.

3. Ҳолатҳои фавқулода (форс-мажор)

3.1. Тарафҳо аз масъулияти қисман ё пурра иҷро накардани уҳдадориҳои Шартномаи мазкур озод карда мешаванд, агар ба иҷро нашудани онҳо қувваи бартарафнашавандае (форс-мажор), ки баъди бастани Шартномаи мазкур дар натиҷаи ҳолатҳои фавқулода (форс-мажор) ба миён меояд, сабаб гардад ва Тарафҳо барои пешгӯӣ ва пешгирии он имконият надошта бошанд. Ҳолатҳои қувваи бартарафнашаванда (форс-мажор) бо хулосаи мақоми салоҳиятдори давлатӣ тасдиқ карда мешавад. Тарафе, ки дучори ҳолати фавқулода (форс-мажор) шудааст, бояд дар ин бора Тарафи дигарро дар давоми ду рӯзи корӣ хабардор намояд.

4. Ихтилофот ва баҳси тарафҳо

4.1. Ихтилофот ва баҳсҳоеро, ки дар рафти иҷрои шартҳои Шартномаи мазкур ба миён меоянд, Тарафҳо пешакӣ бо мақсади пайдо кардани ҳалли қобили қабул ва дар сурати ба мувофиқа нарасидан — бо тартиби муқарраркардаи қонунгузории Ҷумҳурии Тоҷикистон баррасӣ менамоянд.

4.2. Ҳангоми норозӣ будани яке аз Тарафҳо, тарафи норозибуда ҳуқуқ дорад ба Суди Олии иқтисодии Ҷумҳурии Тоҷикистон муроҷиат намояд.

5. Дигар шартҳо

5.1. Дар ҳолати аз тарафи Қарзгир риоя нагардидани шартҳои Шартномаи мазкур, Қарздиҳанда ҳуқуқ дорад Шартномаи мазкурро пеш аз муҳлат бекор намояд.

5.2. Дар ҳолати бекор карда шудани Шартномаи мазкур, Қарздиҳанда ҳуқуқ дорад маблағи ҷарима, фоизҳои нопардохта ва қарзро ситонад.

5.3. Агар таърихи гузаронидани (интиқоли) маблағи дахлдори қарз ё баргардонидани қарз ва пардохти фоизи истифодаи он ба рӯзи ғайрикорӣ дар ш. Душанбе рост ояд, он гоҳ пардохти ин маблағҳо дар рӯзи дигари корӣ сурат мегирад. Ҳангоми ҳисобу китоби маблағи фоизҳое, ки барои истифодаи қарз ҳисоб шудаанд, ба вақти дигар гузаронидани таърихи пардохт ба инобат гирифта мешавад.

5.4. Ҳама огоҳиномаҳо, маълумотномаҳо ё дархостҳое, ки дар байни Қарздиҳанда ва Қарзгир додугирифт мешаванд, бояд дар шакли хаттӣ ба расмият дароварда шаванд.

5.5. Дар ҳолати барҳамхӯрии (азнавташкилии) як ё яке аз Тарафҳо, Шартномаи мазкур эътибори қонунии худро нигоҳ дошта, ба вориси ҳуқуқии он мегузарад.

5.6. Ҳамаи гуна тағйироту иловаҳо ба Шартномаи мазкур танҳо дар ҳолате эътибор дошта, қисми таркибии он ба ҳисоб мераванд, ки агар онҳо дар шакли хаттӣ ва дар намуди созишномаи иловагӣ ба Шартномаи мазкур таҳия карда шаванд.

5.7. Шартнома аз лаҳзаи имзо шудан эътибор пайдо карда, то замони пурра пардохт шудани қарз ва фоизҳои он амал мекунад.

5.8. Шартномаи мазкур бо забони давлатӣ дар ду нусха таҳия гардида, ҳарду нусхаи он эътибори ягонаи ҳуқуқӣ дошта, аз ҷониби намояндагони ваколатдори тарафҳо имзо карда мешавад. Як нусхаи он ба Қарзгир, нусхаи дигар ба Қарздиҳанда дода мешавад.

6. Нишонии ҳуқуқӣ, мушаххасот ва имзои тарафҳо

  • Қарздиҳанда: Бонки миллии Тоҷикистон, Ҷумҳурии Тоҷикистон, ш. Душанбе, 734003, хиёбони Рӯдакӣ 107 А, РМБ 350101101, РМА _________________, Раис __________________________ (ному насаб, имзо, Ҷ.М.)
  • Қарзгир: __________________________________ (ташкилоти қарзӣ), Ҷумҳурии Тоҷикистон, ш. Душанбе, __, РМБ 350101, РМА ___________________, суратҳисоби муросилотӣ _________________________________, Раис ______________________________ (ному насаб, имзо)

Мақолаҳои маъмул

ЗЕ
Мақола · 1 сол пеш

Ҳар роҳе, ки интихоб мекунӣ

Ҳаёт мисли як ҳавопаймоест, ки ту худат пилот ҳастӣ, на мусофир. Танҳо ту қодирӣ самти ҳаракатро интихоб кунӣ, баландӣ ва суръатро муайян намоӣ. Агар раҳнамоиро ба дигарон супорӣ, хавфи гум кардани роҳи ҳақиқии худ вуҷуд дорад. Дар ҳар як қарор, дар ҳар

4
AI
Мақола · 2 сол пеш

Насиҳати Падар

Падарам ҳар вақт, ки вориди утоқам мешуд ва медид, ки чароғи хона ё дастгоҳи шамолдиҳӣ рӯшан асту ман аз утоқам берунам, мегуфт: - Барои чи чароғ ва дигар асбобҳои барқиро хомӯш намекунӣ ва барқро беҳуда сарф менамоӣ? Вақте, ки вориди ҳамом мешуд ва

3
ЗЕ
Мақола · 2 сол пеш

Ростгӯи камоли инсонист.

Ростиро набувад ҳеҷ заволе ба миён. Сарв агар хушк шавад боз асо мегардад. Ростию ростгӯӣ ва росткорӣ фазилатҳои хуби инсонианд. Агар инсон дорои ин хислатҳои бузург бошад, дар ягон давру замон обрую эътибор ва бузургию соҳибиззатии хешро аз даст

2
ЗЕ
Мақола · 2 сол пеш

МУҚАДАСОТИ МО

Дар Конститутсияи (Сарқонуни) Ҷумҳурии Тоҷикистон махсус қайд гирифтааст, ки «Рамзҳои давлатии Тоҷикистон Парчам, Нишон ва Суруди Миллӣ аст». Барои ҳар як тоҷикистонӣ Ватан, миллат, забони тоҷикӣ, Парчам, Нишони давлатӣ, Суруди миллӣ муқаддасанд. Мо ба

2