Аммо дар сатҳи муосири рушди иқтисоди ҷаҳонӣ танҳо дар бораи содироти сармоя сухан гуфтан кофӣ нест. Аз миёнаи асри ХХ марҳилаи сеюми таҳаввули ҳаракатҳои байналмилалии сармоя оғоз меёбад, ки то имрӯз идома дорад, ки дар он равандҳои рухдода истилоҳи "муҳоҷирати байналмилалии сармоя" - ро дақиқтар инъикос мекунанд.
Хусусиятҳои ин давра инҳоянд:

• содироти сармоя на танҳо аз ҷониби кишварҳои саноатӣ, балки аз тарафи бисёр кишварҳои рӯ ба инкишоф ва кишварҳои собиқи сотсиалистӣ амалӣ карда мешавад;
• кишварҳо ҳамзамон содиркунанда ва воридкунандаи сармоя мешаванд;
• содироти сармоя ҳаракати назарраси баръакси сармояро дар шакли фоизи қарзҳо, фоидаи соҳибкорӣ, дивидендҳои саҳмияҳо ба вуҷуд меорад.
  Дар асоси гуфтаҳои боло, муҳоҷирати байналмилалии сармоя ин равандҳои ҳаракати мутақобили сармоя байни кишварҳои гуногуни иқтисоди ҷаҳонӣ новобаста аз сатҳи рушди иҷтимоию иқтисодии онҳо мебошад, ки ба соҳибони онҳо даромади иловагӣ меорад.
  Сабабҳои асосии муҳоҷирати байналмилалии сармоя инҳоянд:

1. Нобаробарии ҷамъоварии сармоя дар кишварҳои гуногун, изофаи нисбии сармоя дар кишварҳои алоҳида.
2. Номувофиқатии талабот ба сармоя ва пешниҳоди он дар соҳаҳои гуногуни иқтисоди ҷаҳонӣ.
3. Тафовут дар ҳосилнокии сармоя аз рӯи меъёри фоизӣ.