Ҷавонӣ буду бо шӯри ҷавонӣ
Туро чун орзу дарёфтам, гул.
Барои васфи ту дар дафтари шеър
Чу мӯят қиссаҳое бофтам, гул.

Яке кибру ғуруре пеша дорад,
Яке бадгӯие андеша дорад.
Вале дар боғзори синаи ман
Дарахти некроӣ реша дорад.

Лаби дарё чи хушбоду ҳавоест,
Дили дарё чу тори пурнавоест.
Ба чашми ақл агар онро бубинӣ,
Чи шӯре дар миёни мавҷҳоест.

Ба номи нек аз дунё равонам,
Чу аҷдоди худам ки бонишонам.
Ба вақти пириям бо қомати хам
Ба душман зарбазан мисли камонам.

Вафои духтарон бодо ҳамеша,
Навои шоирон бодо ҳамеша.
Барои роҳи бехавфи писарҳо
Дуои модарон бодо ҳамеша.

Ба ёди ту дили ман мезанад гум,
Хаёлӣ бингарам то моҳу анҷум.
Рухи гандумнамоятро чу дидам,
Чу мурғи гушнаам дар фикри гандум.

Баҳори дилкушо дорад дили ман,
Суруди ҷонфизо дорад дили ман.
Ватан обу гиламро хуш сириштаст,
Замини босахо дорад дили ман.