Ҳарфи боронии ман ҷорӣ ба сӯи рӯд шуд.
То қатори шоироне номи ман мавҷуд шуд,
Ин фишори хуни ман сӯи само чун дуд шуд.
Ин қадар пурхавф гашта роҳи шеъру шоирӣ,
Он тарафро буд кардам, ин тараф нобуд шуд.
феврали 2005

МАРДИЯМРО МЕБАРӢ

Мардикорӣ меравӣ ту, мардикорӣ меравӣ,
Баҳри ёрӣ ҷумла зорӣ, ҷумла хорӣ меравӣ.
Меравӣ саркӯб аз имкони нохуби замон,
Оҳ, услуби замон!
Охирин мард аз деҳи шабзиндадорон меравӣ,
Аз диёри сангбезори кӯҳистон меравӣ,
Баҳри пайдо кардани нон меравӣ,
Ҷон ба каф бигрифта беҷон меравӣ,
Эй муҳоҷир, лолу ҳайрон меравӣ,
Қувваи кории арзон меравӣ.

Чист дар мулки ғарибӣ интизори рафтанат?
Кист дар мулки ғарибӣ интизори рафтанат?
Эй бародар, сӯхт ҷонам аз қарори рафтанат,
Аз қарори бовиқори рафтанат.

Дардҳо мемониву ҳамдардиямро мебарӣ,
Бо талоше, ки сукуту сардиямро мебарӣ.
Эй бародар, соҳиби диплому унвони зиёд,
Гарчи худро мард мегуфтам қатори мардҳо,
Мардикорӣ меравию мардиямро мебарӣ.
майи 2004