Ба клуб лабонашро инҷ карда Сабур даромада омад.

• Чаро дер омадӣ?! - фарёд кард Низом.
• Қаҳр накун, - гуфт Сабур ва арақи пешониашро бо остинаш пок карда, фаҳмонд: - Ман дарсҳоямро тайёр карда омадам.
• «Дарсҳоямро тайёр карда омадам!» - масхаракунон такрор намуд Низом. - Ман бошам, чор соат боз дар ин ҷо аҳмақ шуда нишастам.
  Низом сею ним соаташро дурӯғ гуфт, вале Сабур ба муболиғаи ӯ аҳамият надод.
• Айби худат! Кӣ гуфт, ки барвақт биё? - Сабур оромона ба курсӣ нишаст ва пурсид: - Бозӣ мекунем?
  Низом пилкашро овезон карда, лаҳзае хомӯш истод ва баъд ҷаҳлаш паст шуду ба сари миз омад.
• Наздиктар шин, - таклиф кард ӯ ва тахтаи шоҳмотро пештар кашид. - Метарсам, ки баъд аз чор-панҷ гашт мотшуда намонӣ.
• Ин қадар баланд нарав, - Сабур дар гаппартой ҳам мағлуб шудан намехост, - мебинем кӣ чӣ хел бозӣ мекунад.
• Марҳамат!
  Низом пиёда ва савораҳои сафедро ба рӯи тахта чида, гуфт:
• Ман пагоҳӣ муаллимамон Исроиловро хуб боб карда фиреб додам-куя.
  Сабур абрувонашро дарҳам кашид ва чашмони қаҳварангаш калонтар шуданд.
• Исроиловро?
• Ҳа, ҳа, роҳбари синфамонро, такрор кард Низом.
• Навакак ҳам қариб бо он кас вохӯрда будам, вале худамро нишон надодам.
  Сабур аз ин гапҳои Низом дар ҳайрат монда, суханони ӯро хомӯш истода, гӯш мекард.
• Ман ба мактаб меомадам, - Низом ба нигоҳҳои кунҷковонаи Сабур аҳамият надода, суханасро давом