Хуфта бедор кардан осон аст,
Ғофилу мурда ҳар ду яксон аст.
Абдулмаҷди Саноӣ

Коҳилиро ҳар ки созад пешае,
Ояд аз хорӣ ба пояш тешае.
Фаридуддини Аттор

Нашнавад аз дўст аблаҳ пандро,
Аз ҷаҳолат бигсалад пайвандро.
Фаридуддини Аттор

То ки аҳмақ боқӣ аст андар ҷаҳон,
Марди муфлис кай шавад муҳтоҷи нон?!
Ҷалолиддини Румӣ

Қатра бо қулзум чу истеза кунад,
Аблаҳ аст ў, риши худ бармеканад.
Ҷалолиддини Румӣ

Ибтило ранҷест, к-он раҳм оварад,
Аҳмақӣ ранҷест, к-он захм оварад.
Ҷалолиддини Румӣ

Нодон ҳама ҷо бо ҳама кас омезад,
Чун ғарқа ба ҳар чи дид, даст овезад.
Бо мардуми зиштном ҳамроҳ мабош,
К-аз суҳбати дегдон сиёҳӣ хезад.
Саъдии Шерозӣ

Баландовоз нодон гардан афрохт,
Ки доноро ба бешармӣ бияндохт.
Саъдии Шерозӣ

Агар нодон ба ваҳшат сахт гўяд,
Хирадмандаш ба нармӣ дил биҷўяд.
Саъдии Шерозӣ