Дар баробари вусъат додани робитаҳои байнидавлатии кумитаҳои таъсисдодашуда барои ҳарчи бештар мустаҳкам намудани робитаҳои иқтисодии кишварҳои араб бо дигар кишварҳои ҷаҳон нақши бузургеро бозидаанд.

Аммо баъдтар дар натиҷаи ҳарчи бештар вусъат ёфтани раванди ҳамгироӣ ва бунёди созмонҳои гуногун фаъолияти асосии Лигаи давлатҳои араб бештар барои ҳаллу фасли масъалаҳои сиёсӣ равона карда шуд.

Хизматҳои шоёни ин ташкилоти ҷамъиятиро дар масъалаҳои ҳаллу фасл ва мӯътадил гардонидани бӯҳрони Либия, зиддиятҳои байни Фаластин ва Исроил, Ироқ бо Эрону Кувайт ва бисёр масъалаҳои дигари дохили кишварҳои араб дидан мумкин аст.

Бо вусъатгирии робитаҳои иқтисодии кишварҳои узви Лигаи давлатҳои араб, аз ҷумла байни давлатҳои нафтистеҳсолкунанда ва нафтистеъмолкунанда, масъалаи ҳисоббаробаркунӣ ба миён омад.

Барои ҳаллу фасли ин масъала соли 1974 ҳашт кишвари Африқо (Алҷазоир, Миср, Либия, Маврикия, Марокаш, Сомалӣ ва Тунис) бо ҳам муттаҳид шуда, Хазинаи асъории кишварҳои арабро (АВВ) таъсис доданд. Баъдтар ба ин фонд қариб тамоми кишварҳои қитъаи Африқо ва Шарқи Наздик ҳамроҳ шуданд.

Фонди асъории кишварҳои араб, пеш аз ҳама, вазифаи ба мувозинат даровардани қурби асъори байни кишварҳои араб, таъмини озодии иваз ва гардиши онҳо, бартараф кардани монеаҳои ҷойдошта дар самти ҳаракати арз ва такмил додани механизми (тартиби) ҳисоббаробаркуниҳои фоиданокро иҷро менамуд.

Барои баробар намудани ҳисобҳои байнидавлатӣ як динори арабӣ баробари се СДР (Ҳуқуқи махсуси қарзгирӣ) қабул шудааст.

Дар лаҳзаҳои лозима барои амалӣ намудани баъзе нақшаҳои стратегӣ ба аъзоёни Хазинаи асъори кишварҳои араб аз ҳисоби хазина қарзҳои дарозмуддати имтиёзнок низ дода мешаванд.

Натиҷаҳои хуби системаи ҷоришудаи қарздиҳӣ роҳбарияти Лигаи давлатҳои арабро водор намуд, ки соли 1979 ширкатҳои маблағгузорандаи давлатҳои арабро бунёд намоянд.