фармояд.

Ҳорун баромада меравад. Амир Исмоил то дергоҳ андешамандона пасу пеш қадам мезанад. Дигар хоб аз дидагонаш паридааст. Ҷойнамоз мегустарад ва ба ибодат машғул мешавад.

Субҳи рӯзи дигар амир Исмоил худ ба суроғи Амри Лайс ба ҳуҷраи ӯ рафт. Амр бо дидани амири сомонӣ ба суръат аз болои ҷойнамоз бархест ва ба истиқболи ӯ чанд гом зад. Амир Исмоил ӯро ба оғӯш гирифт ва аз ҷабинаш бӯсид. Дар ин як шаб Амр хеле пир шуда буд: чашмаш аз бехобӣ варамидаву хун гирифта, пӯсти рӯяш пажмурдуву беранг гардида. Амир Исмоил пардаҳо аз панҷара ба як сӯ кашид ва нури хуршед ҳуҷраро равшан намуд. Амр дар изтироб буд.

Амир Исмоил: Ҳеҷ дил машғул мадор. Нагузорам, ки ба ту газанде бирасад.

Амри Лайс: Ман бим аз халифа дорам. Ӯ маро талаб хоҳад кард.

Амир Исмоил: Дар он тадбирам, ки ҷони туро аз халифа бихоҳам. Дар ин роҳ агар ҳама хазона бадал шавад, раво дорам, ки туро ба ҷон газанде нарасад ва боқии умр ба саломат бигзарони.

Амри Лайс мехоҳад худро дар пои амир Исмоил афганад, вале солори ғозиён ӯро намегузорад.

Амир Исмоил: Дар чунин вазъе дидани чун туе барои ман ногувор аст. Бо арвоҳи падарат, дигар чунин рафтор манамо. Ин хости худованд буд. Ман омадаам бидонам, ки бо ту чун рафтор менамоянд.

Амри Лайс: Агар об гӯям, гулобам медиҳанд. Худованд туро хор магардонод.

Амир Исмоил: Ман ҳанӯз ношито нашикастам. Бо ҳам субҳона мехӯрем.

Амир Исмоил кафҳояшро ба ҳам мезанад ва бародараш Абуюсуф Яъқуб ворид мешавад ва ба ишон таъзим менамояд.

Амир Исмоил: Бифармоед, субҳонаи моро ин ҷо биёваранд.

Хизматгорон пайҳам бо лаълиҳои таом вориди ҳуҷраи ишон мешаванд. Амри Лайс ба гӯшаи остин ашкашро пок