барои воқеан ҳал намудани ин вазифаҳои идоракунӣ ҳисоботи молиявӣ бояд ба қоидаҳои муайян мувофиқат кунад.

Ҳисоботи молиявие, ки онро ҳақиқатан дар идоракунии корхона истифода метавон бурд, бояд саривақтӣ, мубрам, мукаммал, боваринок, тафтишпазир бошад. Чунин ҳисоботи молиявӣ бояд мувофиқи стандарту қоидаҳо ба расмият дароварда шуда бошад.

Масалан, дар ҳисоботи молиявии босифат инъикоси пурраи натиҷаҳои кори ширкат аз ҳисоби истифодаи на танҳо маълумоти муҳосибӣ, балки намудҳои дигари баҳисобгирӣ, инчунин аз ҳисоби муқоисаи нишондиҳандаҳои банакшагирифта бо натиҷаҳои ҳосилшуда ба даст меояд.

Ҳамчунин зимни таҳияи ҳисоботи молиявӣ дар корхонаи калони дорои шуъбаву филиалҳои минтақавӣ, маълумоти оид ба кори шуъбаи болоӣ ва ҳам натиҷаҳои кори филиалу корхонаҳои фаръии онро истифода бурдан лозим аст.

Ҳисоботи молиявиро барои идоракунии ширкат истифода бурдан аз ҳама осонтар аст, агар он содда ва қоидавӣ бошад. Аёният ва қулайии ҳисоботи молиявӣ онро ба василаи боэътимоди идора табдил медиҳад. Ба ғайр аз ин, иҷрои талаботи стандартикунонии ҳисоботи молиявӣ барои наздик намудани он ба талаботи байналмилалӣ имкон медиҳад.

Бояд имконияти ба хубӣ санҷидану муқоиса кардани маълумоти ҳисоботи молиявӣ таъмин шуда бошад. Ин барои боварии комил нисбати воқеияти рақамҳои ҳисоботи молиявӣ кумак мекунад, дар асоси муқоисаи натиҷаҳои фаъолияти корхона тамоюлоти рушди онро беҳтару хубтар тасаввур намудан мумкин аст.

Чунин дарёфти тамоюли рушд зимни таҳлили ҳисоботи молиявӣ барои идораи босамари корхона ва истифодаи пурратари иқтидори он хеле муҳим мебошад.

Дар мавриди талабот нисбати шакли ҳисоботи молиявӣ қайд кардан зарур аст, ки ҳисоботи молиявӣ бояд дар муҳлати муқаррарнамудаи қонунгузорӣ пешниҳод карда шавад.

Чунончӣ, барои таҳияи ҳисоботи молиявии семоҳа қонун 30 рӯз, барои таҳияи ҳисоботи молиявии солона 90 рӯз пас аз хотимаи давраи ҳисоботӣ муҳлат додааст.

Инчунин ҳисоботи молиявии сари вақт таҳияшуда бояд мутобиқи қонунгузорӣ аз ҷониби роҳбару сармуҳосиб ё директори молиявии корхона имзо карда шавад.