«Ҷалолиддини Румӣ» дар таҳқиқи муҳимтарин масъалаҳои адабиёти гузаштаву муосири тоҷик хизмати босазоеро ба сомон расонид. Дар солҳои ҳафтодуми асри гузашта зарурати таълифи силсилаи «Очеркҳо аз таърихи адабиёти тоҷик» бо роҳи дастҷамъӣ ба миён омад. Бо роҳбарӣ ва иштироки бевоситаи Р. Ҳодизода ёздаҳ китоби ин силсила, ки ба давраҳои мухталифи рушди адабиёти классикӣ марбутанд, чоп шуданд.

Нақши донишманди пуркори дар таҳия ва нашри илмию интиқодӣ ва оммавии адабиёти классикӣ, ба хусус, осори Ҷалолиддини Румӣ, Анварии Абевардӣ, Аҳмади Дониш, Шамсиддини Шоҳин, Муҳаммадсиддиқи Ҳайрат, Муҳаммад Иқбол, асари маъруфи «Калила ва Димна» ба забонҳои тоҷикиву русӣ хеле назаррас мебошад. Панҷоҳу ду сол муқаддам Расул Ҳодизода дар хусуси санъатҳои шеъри устод Рӯдакӣ мақолае навишт ва бори аввал зарурати омӯзиши мероси падарсолори назми форсу тоҷикро аз лиҳози бадеият ба миён гузошт. Баъдтар дар хусуси вежагиҳои шеъри Рӯдакӣ мақолаҳои зиёди алоҳидааш дар маҷмӯаву маҷаллаҳо чоп шуданд ва ӯ яке аз мураттибони маҷмӯаҳои «Ҳазор мисраи Рӯдакӣ» ва «Шеърҳо»-и Рӯдакӣ мебошад. Соли 2007 дар ҳамкорӣ бо адабиётшинос Алии Муҳаммадии Хуросонӣ ашъори Рӯдакиро ба чоп омода намуд, ки аз ҷониби нашриёти «Адиб» ба унвони китоби аввали силсилаи «Ахтарони адаб» ба нашр расид. Бо ҷаҳди ин ду муҳаққиқи пуркори матни илмию интиқодии ашъори шоир дар Соли бузургдошти забони тоҷикӣ ва 1150-солагии Абуабдуллоҳи Рӯдакӣ бо хатти ниёгон ба дасти хонандагон расид. Маҳз бо ибтикори Расул Ҳодизода ба хотири таҳияи осор ва таҳқиқу шинохти беҳтари осори Одамушшуарои шеъри форсу тоҷик «Бунёди байналмилалии Рӯдакӣ» таъсис ёфт ва ин созмони ғайридавлатӣ баҳри амалӣ намудани ҳадафҳояш ҳар сол