Чу хашм орад дар уқёнусҳо тӯфон барангезад.
Замин — ин модари меҳрофарин,
Ба фарзанди худ— инсон бахшиши беинтиҳо дорад,
Барои ӯ умеду шодиву обу ҳаво дорад.
Ҳавои равшан,
Оби пок,
Шодии фурӯзанда
Ва умед ба оянда.

ШУЪЛА

Шуъла месӯхт,
Шуъла мерақсид.
Шуъла монанди кӯдаки зебо,
Шуъла монанди лолаи саҳро,
Хурраму шодмона механдид.

Шуъла месӯхт,
Шуъла метобид,
Шуъла гармии пайкари худро,
Дар дили сарди шаб раҳо мекард,
Сари ларзон ба осмон мебурд,
Моҳи шабгардро садо мекард:
Эй рухат сарду орзуят сард,
Қасри фирӯзаат гар аз ман буд,
Осмону замин зи равшаниам,
Ҷовидон гарм буду равшан буд.

Шуъла лабрези орзуҳо шуд,
Шуъла афтоду хуни гармаш рехт,
Шуъла бархост саркашу озод,
Ҳамраҳи боди беқарор гурехт,
То шавад хуни поки як навзод.

ЁДҲО

Уфуқ - гулфом,
Ҳавои ҷангал - атрогин,
Дарахтон - сабз,
Алафҳо - тоза,
Гулҳо - шамъҳои равшани рангин,
Насими субҳдам -ором
Ва мурғони саҳаргоҳӣ ҳаёҳӯгар.

Чӣ афсунест,
Дар мусиқии мурғони ҷангалзор,
Ки дар мо ёдҳоро мекунад бедор?

НАВИСАНДА ДУ ТОРИХ НАДОРАД

Даврон сипарӣ гардаду хуршед бимонад,
Гӯянд нависанда ду таърих надорад.