Гоҳе аз гӯшае чашмаки нур,
Андаке дур,
Ҷангали коҷу сарву сапедор,
Соябонҳои сарсабзи дидор,
Духтаре медавад ҳамраҳи бод.
В-он писарбачаи побараҳна,
Мезанад дод:
Ой ревос, ревос,
Чидаам тоза аз домани кӯҳ,
Ой ревос, ревос,
Решаи зиндагӣ мефурӯшам,
Мекунад илтимос,
Медиҳад такя бар хирмангоҳ.

Роҳ, роҳ,
Нимрӯзону хуршеди сӯзон,
Хорҳо - захми зарди биёбон,
Кӯҳҳо - уқдаҳои дили хок,
Сар кашида бар афлок,
Кӯҳи саркаш шавад уқда гаҳ, гоҳ.
Роҳ, роҳ,
Роҳи пурпечу пиндор,
Бар мадори Замин,
Рӯйи ин
Турфа тӯмор,
Тарҳи торихи инсон:
Ҷангҳо, ҷангҳо,
Қасрҳо,
Қабрҳо,
Хашмҳо,
Сабрҳо,
Фарру фарҳангҳо,
Шеъру мусиқиву рангҳо,
Тобиши нури ҷонҳои огоҳ.

Роҳ, роҳ,
Дар дарозии раҳ,
Қисса кӯтоҳ.

Ҳамсафар,
Ман чӣ гуна ба сар,
Орам ин рӯзу шабро:
То нагӯям дами вопасин, оҳ.
Хушк шуд решаи зиндагӣ,
Шираи шодмонӣ.

Бингар, инак,
Медурахшад дар офоқи шаб Моҳ.
Ҳамчу ойинаи меҳрубонӣ,
Ҳамчу ойинаи меҳрубонӣ.
Мо ва ин роҳ,