Ҷаҳону мардуми ӯро
Басо, ки дидаам, аммо
Надида будам худро
Кунун дар ойина дидам:
Ки оташи дили абрам,
Ки сояи сари кӯҳам.
Чӣ саркаш аст, шигифто,
Сари сиёҳу сафедам?

НА БИРКА, НА РӮД

Маро бисӯзонед
Ва хокистарамро
Бар обҳои раҳои дарё барафшонед.
На дар бирка,
На дар рӯд.

Ки хаста шудам аз каронаҳои сангвора
Ва аз марзҳои масдуд.

СУРУДИ ҶАНГАЛ

Чӣ зебост,
Вақте як назар,
Дар як гӯшаи ин дунёи паҳнавар,
Мунтазири шумост
Ва ӯ мунтазир аст
Мунтазир аст,
Мунтазир аст.
Баҳор равшан - дар лабханди сабзи ҷавонаҳо,
Ҷавонӣ - шукуфазори сапедадамон.
Ишқ - парандаи ҷодӯӣ,
Ба ҳар параш як ситорае дурахшон,
Боли баландаш наҳри нуқраии Каҳкашон,
Равон,
Равон,
Равон.
Ба сӯйи нокуҷо
Ва беинтиҳоии дунёи ибҳому орзу,
Ва ӯ,
Мунтазир аст,
Мунтазир аст,
Мунтазир аст.

САҲНАИ ЯКУМ:

Зери обшори сабз беди Маҷнун,
Рӯйи нимкати чӯбин,
Зан нишаста,
Бо хаёли озод,
Ба гунҷишкони гурусна,
Ба кабӯтарони хиромон,
Ки ба дасту домонаш бӯса мезаданд,
Дона медод.