Миёни ҳамҳама ногаҳ давид шоиру гуфт,
Куҷоӣ, эй дили саргашта?
Бе ту танҳоям.
Даруни синаи шоир
Ситора пинҳон шуд.

ЗАМИНИ БЕИНСОН

Чӣ гуна метавон з-ин воҳима осуд:
Мабодо дасти як Иблиси девона,
Фишор орад ба рӯйи дукмаи шуме,
Ки инсонро кунад нобуд.
Бисӯзад кӯдаку гаҳвора беосеб,
Бипӯсад рӯйи ҳам аҷсоди одамҳо.
Ба дашту дарраву саҳро,
Вале гандум ба ҷо монад.
Чароғи хонаҳо - равшан,
Чароғи чашмҳо хомӯш.
Дарахтон пуршукуфа,
Боғҳо хуррам.
Биноҳо, хонаҳо, холиву беодам,
На андӯҳу на хурсандӣ,
На ишқу орзумандӣ.

Замин танҳову ҷангафрӯз танҳотар.

ИМТИҲОН

Пушти дар пур саволу ҷавоб аст,
Пушти дар дафтар асту китоб аст,
Хандаву гиряву изтироб аст.
Пушти дар издиҳоми ҷавонон,
Ҳалқаи васли анҷому оғоз.

Ҳар касе дар дилаш орзуе,
Ҳар касе дар пайи ҷустуҷӯе,
Ҳар касе мебарад раҳ ба сӯе,
Ҳар касе меравад субҳи фардо,
То дари бастаеро канад боз.

ЗАНБӮРИ АСАЛ

Ба назди ман нависанда ба занбӯри асал монад,
Ки нӯшад шираи гулҳои ҳастиро
Ва бо ҷони бузурги худ даромезад,
Ки як маъҷуни дармонбахши нерӯофарин созад,
«Ки гар ғам лашкар ангезад»
Бунёдаш барандозад.

АФЛОТУНӢ

Ситораҳои дурахшон,
Ситораҳои дурушт,
Зи дур рехта бар рӯйи шохаҳои баланд.