Шаб.
Шаби беситораи дарё.
Торикии ваҳшии ваҳшатзо.
Ларзиши равшани шуълаи шамъҳо,
Шамъҳо,
Шамъҳо,
Ҳазорон шамъ,
Дар ҳазорон даст,
Пайдову пинҳон.

Ҳаракат,
Ҳаяҷон,
Ҳамҳамаи хомӯш,
Саҳрои беситора - сияҳпӯш.

Тобиши тилоии шуълаҳои шамъҳо,
Шамъҳои саркаш,
Шамъҳои сӯзон,
Дар ҳазорон дил,
Дар ҳазорон ҷон.

ҲУЛАНДПОРК

Шамъҳои равшани наргисзор,
Рӯйи махмали сабзи чаман,
Чунон дурахшонанд,
Ки Моҳ намедонад,
Партави тилоияшро куҷо барафшонад?

Ёсҳои зард,
Бар соқаҳои қаҳваии дарахтон,
Дар сози насим,
Зангӯлаҳо зарринанд,
Бар соқи раққосаҳои ҳиндӣ,
Он гаҳ-гаҳ пуршӯранду дастафшон.

Бозии лаклакҳои ошиқ,
Дар найзорҳои офтобӣ
Ва рақси қуҳои сапед
Дар дарёчаи обӣ.

УМРИ ҶУДОӢ ДАРОЗ НЕСТ

Эй ёри дури ман,
Наздиктар
Зи ҳар каси дигар!
Ҳар бор номаи ту занад бӯса бар лабам,
Аз як умед сарзада саршор мешавам.
Бехобии шабона агар вораҳонадам,
Ҳар субҳ бо хаёли ту бедор мешавам.
Эҳсосро ба вожаи ширин ниёз нест,
Як рӯзи талх зинда намемондам, ар набуд
Бовар ба ин ки умри ҷудоӣ дароз нест,