Рост гуфтаанд, ки зангиру аспгир ҳама девонаанд ва агар чунин намебуд, бояд ҷабрдидае, ки дар ёди донишҷӯи фирорие саргарми хаёлҳои пурпечутоб шуда, қариб ба зери чархи мошин монда буд, баъди иштирок ва кашмакашиҳо дар тӯйи Наргис ва суханони огоҳкунандаи он марди маст нисбати он бузичаи зебо, ки ӯро ба ситора шабеҳ дода буд, ё худ он ронандаи ҳушёру хушдор андеша мекард. Аққалан ҳамон мардеро, ки аз гиребонаш гирифта буд, меёфт ва шарҳу эзоҳи он каломи ба забон овардаашро талаб мекард, вале нафаре, ки акнун аз марги нобаҳангоми нимаи дуюми хеш афсӯсу надомат хӯрд, на кореро аз ин самт оғоз намуду на дар самти муқобил анҷом дод...
Баъди шаш моҳ аз шиносоии аввалин онҳо ба таври расмӣ риштаҳои муҳаббатро пайвастанд ва то субҳи аввали баъди шаби висол Фирӯзи Файз аллакай аз ин пайроҳа гузашта буд ва медонист, ки дар чунин ҳолатҳо чӣ хел занҳо аз хоб бедор мешаванд ва дар он лаҳзаҳои аввалини шаби баъдӣ ба висоли ёр расидан чӣ намуде доранд, эҳтимол дар чунин лаҳзаҳо афту андоми мардон ҳам аз нигоҳи нимаи дуюмашон мавриди назар қарор мегирад, вале бояд эътироф кард, ки мардҳоро ҳатто боре ҳам дар шеъри бадтарин мавриди ситоиш қарор надодаанд. Дар чунин ҳолатҳо ҳам тафсири ситораи хонадон ва фариштаи осмон дар тамоми адабиёти ҷаҳон дар васфи зан ва ба номи оне рӯй лисон омада, ки мардон ҷинси латифашон ном мебаранд. Дар он субҳи содиқ, ки ӯ козиб шуданашро таманно намуда буд, Мижгон кӯрпаро ба сар кашида, дубора ҷисми нозуку урёни хешро ба ҷисми шавҳар ҷафс кард, вале чун нурҳои хуршеди Ховар пардаи ҳарири оинаи тирезаро убур намуда, болои бистари навхонадорон ба “рақс” даромад, нафаре, ки дар зери гунбази абрешимин борҳо аз самои бекарона ба замин омада буд, дилу бедилон бистари гармро тарк намуд...
Арӯс бо табассуме ҷисми то кунун зебову урёни хешро бо хилъати моҳутдоре аз чашми шавҳар пинҳон намуда, аз бистар бархоста, ба оббозӣ рафт. Манзилҳои якҳуҷрагӣ дар хонаҳои бетонӣ тарзе сохта шудаанд, ки агар дар ҳаммом паша пар занад, садояшро дар ҳуҷра мешунавӣ ва дар он субҳи солеҳон ҳам лаҳзае пас аз ҳаммом садои фаввора задани об ба гӯши ӯ расид.