Соли гузашта дар ҳамин фасли дай, дурусттараш 18 декабр, Абдуҷаббор Исломович аз олам даргӯзашт. Ана дар ҳамон маросими видоъ Файзулло Ҳабиб ба назди ман омад ва дар бораи акои Абдуҷаббор бо як самимияте сухан гуфт, вале дар ин субҳ ӯ боз дар ҳолати мастӣ ба сари чанбарак нишаста буд. Ниҳоят худро ба даст гирифта пурсидам:
-Магар дар ин субҳи солеҳон кормандони БДА дар хоб монданд?
-Кормандони БДА ҳам инсонанд ва чун ҳар як инсон нафс доранд.
-Ба ҳар ҳол амали худат мавриди ситоиш нест ва он метавонад оқибати ногувореро ба бор оварад.
-Медонам, начальник, вале ман на ба он дараҷае мастам, ки...
-Хуб мешуд, ки дар чунин ҳолатҳо умуман ба сари чанбарак наменишастед.
-Суханони шумо ҳам, рафиқ сардор, ҷон доранд, вале то кунун низоъҳои оилавии мо ҳал нашуданд ва бандаро дар суд интизоранд.
-Мушкилот чист?
-Даъвои молумулкӣ, вале ман ба ӯ хонаро гузошта рафтанӣ нестам.
-Магар худат як маротиба аз баҳри он хона нагузашта будӣ?
-Кай?
-Ду сол пеш, вақте ки хонаро оташ задӣ.
...
-Чаро хомӯшӣ, ё гумон ҳамин хел осонакак аз ҷазо раҳо ёфтӣ?
-Дар он лаҳзаҳо ман маст будам, вале баъдтар фаҳмидам, ки худораҳматии Абдуҷаббор Исломович маро хеле дастгирӣ намуда будааст.