Онҳо рў ба рў шуданд, вале аз чӣ бошад, ки ҳарду ҳам салом гуфта натавонистанд. «Чӣ гап?» ба ҷои салом пурсид Ромиз, «ҳеҷ гап не» ба ҷои алейк гуфт Ҷаҳоноро.
— Дадатонро хабаргирӣ рафта будед? – баъди хомўшии зиёде пурсид Ромиз.
— Не, назди роҳбарам будам, – ҷавоб дод Ҷаҳоноро ва пай бурд, ки раги пои Ромиз кашида як қадам пас рафт. – Ҳа, чӣ шуд?
— Туфлиам поямро танг кард, – пошнаи пой бардошта ва нўги туфлӣ ба замин тира карда гуфт ў.
— Роҳбаратон кӣ!? – аз пас садо кард ў.
— Доктор – роҳбарам, – сар барнагардонида ҷавоб дод Ҷаҳоноро ва яқин кард, ки ў рашк барад.
Ромиз хост ҳамаашро пурсида, бифаҳмад, ки роҳбараш кӣ ҳасту барои чӣ ин қадар ў бо даҳони пур «роҳбарам» мегўяд. Вале ба ҷои ин аз даҳонаш дигар гап баромад:
— Як шаб маникюр, як шаб роҳбар, як шаби дигар...
— Ба шумо чӣ?
— Рост. Туро газад, маро чӣ ғам...
— Наход шумо ҳам рашк дошта бошед?
— Чӣ, ман сангам?
— Гап дар сангу кулўх будан не. Рашк ин хоси одамони ҷоҳил аст.
— Шумо, бешўхӣ ҳамин зайл фикр мекунед?
— Бешўхӣ.
— То алвақт рашкро хоси одамони баномус мегуфтанд,
— Мо содда набошем... ору номус...
Ромиз дигар чизе нагуфт. Аз ҳаракатҳояш; сар хам карда манаҳ соиданаш, аз ҳм-ҳм карданаш Ҷаҳоноро пай бурд, ки ў хафа шудааст. Аз ғазаб чизе аз сари дилаш боло шуда, гулўву гарданашро паймуда, ба воситаи хун ба ду чакка омад ва рагҳои хунгардро фишор дод; сарашро ба дард овард, ўро безобита кард.
Пурғазаб шуд, дандон гиз, ангушт мушт кард, вале ба Ҷаҳоноро чизе гуфта натавонист. Ромиз намехост, ки зани номеҳрубон аз ў хафа шавад.
— Ба назарам, шумо ҳам чун ман вақти хазонрез хафа мешавед?
— Хазонрез бало дорад... Махсусан хазони чанор...
— Чанор сояи хуб дорад.
— Сояаш дар гўр!
Агар Ҷаҳоноро ин ҳарфро чанд рўз пештар мегуфт, Ромиз кунҷкобӣ карда сабаби аз чанор норозӣ будани ўро мефаҳмид, вале ҳоло ҳоҷате надорад. Аз қиссаи шабинаи Мулло-амак ҳамааш маълум шуд. Вале Ромиз дар ин хусус ҳарф заданӣ набуд, кўшиш мекард, ки он қиссаро ба хотир наорад. Ҳар чӣ аз Мулло-амак шунида буд, хост аз сар дур кунад, вале ҷуръату диловарии Садафмоҳро кас фаромўш карда натавонад.