Албатта рост омадани ривоят дар бораи мурғони рӯҳи Рустаму Таҳмина ва Сӯҳроб бо нақли муаллифи «Бурҳони қотеъ» нисбат ба парандае, ки онро «сурхоб»-аш меноманд, воқеаи тасодуфист, валекин дар ин ривояту дар он маълумоти фарҳангӣ орзуи ширину гуворои дерини халқ ниҳон аст. Онҳо аз дасти ҳосидону бадтинатон ҳалок шудани қаҳрамони дӯстдоштаашон Сӯҳроб ва аз майдони ҳарбу зарби зиндагӣ баромада рафтани Рустам ва дар доғи фарзанди азиз ҷон додани Таҳминаро ҳаргиз фаромӯш накардаанд. Аз ин рӯ, халқи мо тараннуми висоли ин қаҳрамонони наҷибашро ба дил парварда, бо унвони рӯди Сурхоб дар хотир нақш бастааст. Онҳо эътиқод доранд, ки то даме оби Сурхоб ҷорист ва то даме ин кӯҳу пушта барҷост, навиди висолу тараннуми ишқро Сурхобу Қақнус баҷо меоваранд...