Баъд аз ин шайтон ба шакли одамӣ
Дар тамоми даҳр пайдо шуд,
Соҳиби курсиву мансаб гашт,
Дар сари фатвои дунё шуд.

Баъд аз ин оё чӣ бояд кард?!
Дард, дардо дард, дардо дард!

Баъд аз ин оё чӣ бояд кард ?!
Эй Худо, моро ту аз нав бозсоз,
Ё ки шайтонро зи ҷисми мо бурун андоз...
11.11.2015
ГӮРКАН

Гарчи умре гӯркан меканд гӯр,
Худ вале аз фикри мурдан буд дур.
Фикри мурдан ҳеҷ дар ёдаш набуд,
Чунки баҳри дигарон меканд гӯр.

Лек рӯзе гӯркан бемор шуд,
Пурғаму афтода гашту хор шуд,
Оқибат бо ранҷҳо афтоду мурд,
Баҳри ӯ ҳам гӯркан даркор шуд.
23.06.2015

МАҲРУМ АЗ БИҲИШТ

Одаме, ки ҷангалашро дар куҳистон сӯхт, сӯхт,
Одаме, ки чашмаҳоро дар куҳистон қоқ кард,
Одаме, ки тир бар оҳу заду оҳе нагуфт,
Ҷуфти гурги вопасинро ҳам бикушту тоқ кард.

Одаме, ки кӯҳҳоро бесаробон карду рафт,
Одаме, ки лолазоронро биёбон карду рафт,
Одаме, ки ронда шуд аз он биҳишт, акнун, дареғ,
Ин биҳишти нақдро бар хок яксон карду рафт.
23.02.2011