Ёде, ки ҳамеша пок мисли саҳар аст,
Хандону хуҷастарӯву волоназар аст,
Ҳар вожаи ӯ ба лаб чу қанду шакар аст,
Ин ёди накӯ – ёди Ашӯри Сафар аст.
12.06.2018

БОЗГАШТ БА ВАТАН
Ба ёдбуди Бозор Собир

Сарҳади бесарҳади фарҳанги моро,
Марзҳои ори моро, нанги моро,
Бораҳои шаъни мо аз санги моро,
Ӯ дақиқан дар сухан бунёд кард;
Шеъри моро аз асоратҳои такрор,
аз гирифтории гуфтор
Оқибат озод кард;
Ҳайкали подори симои бузургони Ватан,
Ҳайкали Фирдвсиву Синову Айнӣ,
шаҳкитоби»Тоҷикон»-ро
Ӯ ба сабки мондагори хештан эҷод кард.

Дар ҳаду сарҳадшиносии сухан
Марзҳои гулшани садранги моро ӯ кашид,
Дар ҳаду сарҳадшиносии Ватан
Марзҳои нанги моро ӯ кашид.

Дар самои шеъри тоҷикӣ
Ӯ насими тозае овард, моро шод кард,
Дар ҳаду сарҳадшиносии ҳунар
Боғу гулшанҳои нав обод кард.

Ҳамчу як хайёти моҳир,
Бар қади шеъри мусир
Ҷомае зарбафту зебо дӯхт ӯ,
То кунад равшан дилу симои моро,
Гулхане дар пайкари сӯзони худ афрӯхт ӯ.