Ақидаҳои хатмкунандагони муассисаи таҳсилоти олии тиббӣ дар бораи омодагӣ ба ихтисоси оянда
Н.С. Ҷӯраева, О.Н. Мамадаминов
Кафедраи нигаҳдории тандурустӣ ва омори тиббӣ бо курси таърихи тибби Муассисаи давлатии таълимии «ДДТТ ба номи Абӯалӣ ибни Сино», Душанбе, Тоҷикистон
Мақсад. Таҳлили қаноатмандӣ аз таълим ва нақшаҳои ояндаи хатмкунандагони донишгоҳи тиббӣ вобаста ба ихтисоси ояндаашон.
Мавод ва усулҳо. Дар байни 300 нафар донишҷӯёни курси 6-уми факултети тиббии Муассисаи давлатии таълимии «Донишгоҳи давлатии тиббии Тоҷикистон ба номи Абӯалӣ ибни Сино» бо истифода аз саволномаи мутобиқшудаи «Таҳлили омодагии хатмкунандагони донишгоҳҳои тиббӣ ба ихтисоси оянда» тадқиқоти сотсиологӣ гузаронида шуд. Дар назарсанҷӣ донишҷӯёни аз 21 то 28 сола иштирок доштанд, ки 171 нафарашон (57%) мардон ва 129 нафарашон (43%) занон буданд.
Натиҷаҳо. Танҳо 65% донишҷӯён аз сатҳи таҳсилашон қаноатманд буданд. 68,0% хатмкунандагон ихтисоси ояндаи худро аллакай муайян кардаанд. Дар байни ихтисосҳои интихобшуда «ҷарроҳӣ», «акушерӣ ва гинекология», «кардиология», «неврология» ва «терапия» бартарӣ доштанд. Аксарияти донишҷӯён (82,5%) ният доранд, ки таҳсилро идома дода, ба фаъолияти илмӣ машғул шаванд, 13,9% тасмим гирифтанд, ки ба тибби амалӣ раванд. 76,7% хатмкунандагон хоҳиши идомаи таҳсил дар хориҷи кишварро қайд карданд. Минтақаҳои афзалиятнок – кишварҳои ИДМ (37,5%) ва Аврупо (35,6%).
Хулоса. Натиҷаҳои таҳқиқот нокифоя будани омодагии амалии хатмкунандагонро дар муқоиса бо омодагии назариявӣ муайян намуданд. Ин зарурати равона кардани раванди таълимро ба ташаккули малакаҳои амалӣ тавассути ҷорӣ намудани усулҳои фаъоли таълим ва моделсозии ҳолатҳои клиникӣ барои ташаккули тасаввуроти донишҷӯён дар бораи ихтисоси ояндаашон нишон медиҳад.
Калимаҳои калидӣ: донишҷӯён, сатҳи омодагӣ, ихтисос.
Манбаъ: маҷаллаи илмию амалии «Илм ва таҳсилот» (Наука и образование), 2024, ҷ. 1, №4, саҳ. 412–426. DOI: 10.25005/3078-5022-2024-1-4-412-426




