Ҳадиси бод магӯ, ин қадар зиёд магӯ,
Ба меҳр ҳарф бизан, бехудона дод магӯ.
Бубин, ки шеъри ман аст ин, ки рӯбарӯи ту аст,
Ту бедилона варо навтарин мавод магӯ.
Туи бузург биғунҷӣ ба шеъри кӯчаки ман,
Ҳудуди шеъри маро тангу ҳарзазод магӯ.
Ман ориёияму аз нажоди хубонам,
Маро зи ҳар насабеву зи ҳар нажод магӯ.
Муборизи раҳи ишқам мани назарногир,
Маро ба фанни муҳаббат ту бесавод магӯ.
Ба он ки кӯҳи бузургӣ, ба он ки мушти парам,
Ман аз ту зӯртарам, ёри ман, наход магӯ!
марти 2007

ҲАДИСИ ТАҚДИР

Хуршед ба тори сар балогардон аст,
Дил моили мулки дури кӯҳистон аст.
Хоҳам, ки даме сӯи ғизолон биравам,
Алъон биравам, вале куҷо имкон аст.

Эй шамс, саломи ман ба Помир бубар,
Бар кӯҳи баланди кабку нахчир бубар.
Дур афтодам, чи гуна дур афтодам,
Бар зодгаҳам ҳадиси тақдир бубар.

Ҷону тани ман ба шаҳр саргардон аст,
Дар сина вале ҳавои кӯҳистон аст.
Ҳастам дигару дигар будан маҷбурист,
Эй дӯст, муборизӣ магар осон аст?!
декабри 2006