Бурун намо ҷавоби худ, итоби худ,
Фузун намо ҳисоби худ, савоби худ,
Намо қади базеб чун хитоби худ.
Чаро ба хона пурғамӣ, чаро, чаро?

Туе, ки диданат равост, нозанин,
Надиданат аҷаб ҷазост, нозанин,
Вазиданат пури ҳавост, нозанин,
Чамиданат хуши Худост, нозанин,
Чаро ба хона маҳкамӣ чаро, чаро?
августи 2004

ҲАМСОЯИ ҚУЛЛАҲО

Аз кишвари Ориёям, эй дӯст,
Ҳамсояи қуллаҳоям, эй дӯст.

Ҳамсӯҳбати офтобу маҳтоб,
Як лӯъбатаки қазоям, эй дӯст.

Ворастатарин каси ҳаётам,
Вобастатарин раҳоям, эй дӯст.

Тарсанда зи сахт меҳр бастан,
Тарканда зи норавоям, эй дӯст.

Бишкуфта, вале намешавам во,
Бинҳуфта, валек воям, эй дӯст.

Пурҳуснтарин навор, аммо
Пурҳузнтарин навоям, эй дӯст.
Ҳамрешаи Рӯдакиву Румӣ,
Ҳамбешаи сад балоям, эй дӯст.

Аз аҳли риё чӣ ҳарф гӯям,
Аз аҳли риё фаноям, эй дӯст.

Ҳарчанд вале фаноям, эй дӯст,
Пояндаву бобақоям, эй дӯст!
марти 2006

ҒАМНОМА
Дар марги падари бузургворам

Падар, аз марги ту қаддам дуто шуд,
Замину осмонам безиё шуд.
Дилат таркиду таркидам зи андӯҳ,
Дигар ин қолабам бемӯҳтаво шуд.
Хаёлам шаҳсутуни хона бишкаст,
Маконам дар дили вайронсаро шуд.
Ҳазорон шукри модар гӯям, аммо
Шикасти рафтанат ҳай бедаво шуд.
Наям тифлу вале аз рафтани ту,
Ба духти бепадар, донӣ, чиҳо шуд?
Ба дунё кӯҳпайкар мард будӣ,
Чу рафтӣ, кӯҳи ғам дар қалб ҷо шуд.