Production ҷойи озмоиш(тест) нест

Агар дар як ширкати воқеӣ Jira-ро идора ва нигоҳдорӣ кунед, эҳтимол ин ҷумларо шунидаед ё худатон гуфтаед:

«Тағйироти хурд аст, мустақиман дар муҳити асосӣ татбиқ мекунам».

Ва эҳтимол ҳадди ақал як бор аз гуфтани ҳамин ҷумла пушаймон шудаед.

Ман маъмури Jira ҳастам ва қисми зиёди таҷрибаам ба версияи Data Center марбут аст. Он чи дар ин чанд сол омӯхтаам, сода аст:

Бештари носозиҳои Jira аз хатои нармафзор ба вуҷуд намеоянд; онҳо натиҷаи тағйироте ҳастанд, ки бе озмоиш дар муҳити асосӣ татбиқ шудаанд.

Ва қариб ҳамеша решаи мушкил ин аст, ки муҳити озмоишӣ вуҷуд надоштааст ё, агар вуҷуд доштааст, ба муҳити асосӣ монанд набудааст.

Ин навишта дар бораи ҳамин масъала аст, на дар бораи он ки Docker чист.

Тағйироти хурде, ки воқеан хурд нест

Се намунаи маъмултарини «тағйироти хурд», ки метавонанд дар муҳити асосӣ мушкил эҷод кунанд:

1. Илова кардани майдони фармоишӣ — Custom Field

Илова кардани майдони фармоишӣ дар Jira шояд сода намояд, аммо ҳар майдони нав метавонад ба ҷустуҷӯ, индекс, шаклҳои воридкунии маълумот ва таҷрибаи корбар таъсир расонад.

Дар низоме, ки чандсад ҳазор масъала — Issue — дорад, ин таъсир оҳиста-оҳиста зоҳир мешавад. Як ё ду майдон мушкил эҷод намекунад, аммо вақте шумораашон зиёд мешавад — ва одатан зиёд мешавад, зеро ҳар гурӯҳ майдони худро мехоҳад — он гоҳ хароҷоти воқеии онҳоро дарк мекунед.

2. Тағйир додани раванди фаъоли кор — Workflow

Агар аз раванди коре, ки масъалаҳои фаъол дорад, як ҳолатро ҳазф кунед, мумкин аст масъалаҳо дар ҳолате дармонанд, ки дигар роҳи муайяни баромадан аз он вуҷуд надорад.

Корбар мегӯяд:

«Тугма нест».

Шумо мепурсед:

«Кадом тугма?»

Ва танҳо баъд мефаҳмед, ки тағйироти хурд дар раванди кор роҳи фаъолияти чанд гурӯҳро бастааст.

3. Якҷо кардан ё тағйир додани нақшаи иҷозатҳои дастрасӣ — Permission Scheme

Ин маврид одатан нисбат ба дигарон оромтар ва ноаёнтар рух медиҳад.

На хатое мебинед ва на касе ҳамон лаҳза пай мебарад. Танҳо як гурӯҳ рӯзи дигар мефаҳмад, ки дигар лоиҳаи худро намебинад ё ҳуқуқҳои дастрасие, ки пештар дошт, аз байн рафтаанд.

Ҳеҷ кадоми инҳо ҳатман хатои нармафзор нестанд. Дар бисёр мавридҳо Jira маҳз ҳамон кореро мекунад, ки ба он фармудаед. Мушкил ин аст, ки пеш аз татбиқи тағйирот дар муҳити асосӣ таъсири онро надидаед.

Чаро одатан муҳити озмоишӣ вуҷуд надорад?

Ҷавоби ростқавлона ин аст: аз роҳбар гирифтани сервери дуюм душвор аст.

Одатан баҳс чунин оғоз мешавад:

«Яъне мехоҳӣ барои озмоиш ҳам сервери алоҳида бигирем?»

Ва суҳбат ҳамин ҷо ба охир мерасад.

Дар ҳамин ҳолат Docker метавонад кумак кунад. На барои он ки сеҳр мекунад, балки барои он ки хароҷоти оғозро кам мекунад.

Ба ҷойи он ки аз аввал дар бораи харидан ё омода кардани сервери комил суҳбат кунед, метавонед аз муҳити ҷудошуда ва сабуктар оғоз намоед. Муҳите, ки барои озмоиши тағйирот, машқи навсозӣ, санҷиши афзонаҳо ва тақлиди хатогиҳо кофӣ бошад.

Ин танҳо масъалаи техникӣ нест; масъалаи гуфтушунид ҳам ҳаст.

Муҳити озмоишии воқеӣ чӣ маъно дорад?

Муҳити озмоишии воқеӣ танҳо ин нест, ки Jira ба кор дарояд ва саҳифаи воридшавиро бинед.

Ҳадди ақал ба ин се ҷузъ ниёз доред:

• Худи Jira
• Пойгоҳи додаҳои алоҳида
• Проксии баръакс — Reverse Proxy

Ҷузъи аввал равшан аст.

Ҷузъи дуюм аз он чи одатан тасаввур мекунанд, муҳимтар аст. Озмоиш бо пойгоҳи додаҳои дохилӣ ё муваққатӣ тасвири дақиқи рафтори воқеии Jira-ро намедиҳад. Агар муҳити асосии шумо бо PostgreSQL ё пойгоҳи додаҳои дигар кор кунад, муҳити озмоишӣ ҳам бояд то ҳадди имкон ба ҳамон сохтор наздик бошад.

Ҷузъи сеюм низ бисёр вақт нодида гирифта мешавад: проксии баръакс.

Бисёре аз мушкилоти воқеии Jira танҳо ҳангоми кор аз паси прокси зоҳир мешаванд, махсусан мушкилоти марбут ба URL, равонасозӣ — Redirect, суроғаи асосӣ — Base URL, SSL ва пайвандҳо.

Агар муҳити озмоишии шумо прокси надошта бошад, маҳз ҳамон гурӯҳи мушкилотеро намесанҷед, ки одатан дар муҳити асосӣ бештар дарди сар эҷод мекунанд.

Хатое, ки бисёриҳо ҳангоми бори аввал ба роҳ мондани Jira бо Docker мекунанд

Масири насби Jira ва JIRA_HOME ду чизи гуногунанд.

Масири насб

Ҷоест, ки файлҳои бинарӣ, Java, Tomcat ва файлҳои иҷрошаванда ҷойгиранд. Ин қисм метавонад ҳангоми навсозӣ ё иваз кардани Image тағйир ёбад.

JIRA_HOME

Ҷоест, ки додаҳои воқеии Jira нигоҳ дошта мешаванд:

• Файлҳои замимашуда — Attachments
• Индекс — Index
• Сабтҳои рӯйдодҳо — Logs
• Афзонаҳо — Plugins
• Танзимот — Configuration
• Додаҳои маҳаллӣ — Local data

Агар дар Docker ин ду қисмро дуруст ҷудо накунед ё барои JIRA_HOME ҳаҷми нигоҳдории доимӣ — Volume — муайян насозед, мумкин аст ҳангоми аввалин азнавсозии контейнер додаҳои муҳити озмоиширо аз даст диҳед.

Ва азбаски он «танҳо муҳити озмоишӣ» буд, одатан касе барои он нусхаи эҳтиётӣ ҳам нагирифтааст.

Агар боқии ин навиштаро фаромӯш кунед ҳам, ҳамин як нукта ба танҳоӣ арзиш дорад:

JIRA_HOME додаҳои воқеии шуморо нигоҳ медорад; бо он мисли як масири муваққатӣ муносибат накунед.

Пас аз ба кор даромадани муҳити озмоишӣ чиро бояд санҷид?

Муҳити озмоишие, ки ҳеҷ гоҳ истифода намешавад, аз надоштани муҳити озмоишӣ фарқи чандоне надорад.

Рӯйхати амалии ман барои озмоиш чунин аст:

1. Ҳар тағйир дар нақшаҳо — Scheme

Пеш ва пас аз тағйир шумораи нақшаҳоро санҷед. Jira баъзан дар натиҷаи тағйироти сода нақшаҳои нав месозад ё вобастагиҳое эҷод мекунад, ки идора кардани онҳо баъдтар душвор мешавад.

2. Ҳар навсозии версия

Навсозиро як бор пурра дар муҳити озмоишӣ анҷом диҳед. На бо додаҳои намунавӣ, балки бо додаҳои наздик ба воқеият ва бо ҳамон афзонаҳое, ки дар муҳити асосӣ доред.

3. Ҳар скрипт ё раванди худкор — Automation

Махсусан скриптҳое, ки масъалаҳоро мекӯчонанд, майдонеро тағйир медиҳанд ё гузариш байни ҳолатҳо — Transition — иҷро мекунанд. Он чи барои даҳ масъала дуруст кор мекунад, ҳатман барои чанд ҳазор масъала бе мушкил иҷро намешавад.

4. Барқарорсозӣ аз нусхаи эҳтиётӣ

Ин мавридро ҷиддӣ бигиред. Нусхаи эҳтиётие, ки ҳатто як бор аз он барқарорсозӣ анҷом нашудааст, ҳанӯз нусхаи боэътимод нест. Барқарорсозиро бояд дар муҳити озмоишӣ машқ кунед, на рӯзе, ки муҳити асосӣ аз дастрасӣ берун мондааст.

Дар ин роҳнамоҳо масъалаҳои зеринро шарҳ додаам:

• Ҷудо кардани дурусти JIRA_HOME
• Пайваст кардани Jira ба PostgreSQL
• Танзими хотира
• Истифодаи проксии баръакс
• Нуктаҳои аввалия барои монандтар кардани муҳити озмоишӣ ба муҳити асосӣ

Хулоса

Муҳити озмоишӣ барои Jira як имконияти зиёдатӣ нест.

Агар Jira дар ширкати шумо абзори асосии идоракунии кор, дастгирӣ, таҳия ё фаъолияти амалиётӣ бошад, муҳити озмоишӣ арзонтарин суғуртаест, ки метавонед барои он дошта бошед.

Хароҷоти чанд гигабайт RAM ва вақти андаке барои ба роҳ мондани муҳити озмоиширо бо хароҷоти як рӯзи халал дар кори Jira муқоиса кунед.

Қариб ҳамеша ҷавоб равшан аст.

Агар пас аз ба роҳ мондани муҳити озмоишӣ ба ин хулоса расидед, ки мушкили асосӣ худи сохтори Jira аст, на набудани муҳити озмоишӣ, ин баҳси алоҳида мебошад. Он чи одатан дар паси ҷумлаи «Jira кор намекунад» пинҳон аст, сохторест, ки аз рӯзи аввал барои он гурӯҳ тарҳрезӣ нашуда буд.