Сурудҳо

Кишварам, бо Ватан сарфарози ҷаҳонем,
Бо Ватан ҷовидон, пуртавонем.
Дар вафои Ватан устуворем,
Насли фархундаи Ориёнем.

Нақарот:
Кишварам, модарам, ифтихорам,
Маҳди ҷонпарварам, эътиборам.
Парчамат то абад пар-парафшон,
Дар канорат ҳама боғу бӯстон.
Ҳарфи қонуни бахтат муқаддас,
Нури хуршеди рӯзат ба ҷавлон.

Нақарот:
Кишварам, модарам, ифтихорам,
Маҳди ҷонпарварам, эътиборам.

Муаллим

Муаллими меҳрубон,
Меҳратон дар дилу ҷон.
Лафзи ширину равон
Мо аз Шумо омӯхтем.

Нақарот:
Муаллим, муаллим Ҷон, муаллим.

Ба ҳар савол ҷавобро,
Донистани ҳисобро,
Ҳам хондани китобро
Мо аз Шумо омӯхтем.

Нақарот:
Муаллим, муаллим Ҷон, муаллим.

Ҳифзи хоки Ватанро,
Ба вай содиқ буданро,
Васфи боғу чаманро
Мо аз Шумо омӯхтем.

Нақарот:
Муаллим, муаллим Ҷон, муаллим.

Зиёдулло Шаҳидӣ

4 майи соли 1914 дар шаҳри Самарқанд таваллуд шудааст. Композитори тоҷик. Артисти халқии Тоҷикистон (1974). Соли 1932 мактаби миёнаро хатм карда, то соли 1939 ҳамчун навозанда дар театрҳо ва студияҳои радиои Тошканд, Самарқанд ва Сталинобод кор кардааст. Солҳои 1939-1952 роҳбари ансамбли тарона ва рақси филармонияи давлатии Тоҷикистон буд. Ӯ дар студияи назди ИК Тоҷикистон (1943-1946) аз А.С.Ленский ва С.А.Баласанян дарси композиторӣ меомӯзад ва соли 1949 Студияи миллии дусолаи назди Консерваторияи Москва, 1957 шӯъбаи миллии консерваторияи мазкурро хатм кардааст. Солҳои 1956-1960 вазифаи раиси Правленияи ИК Тоҷикистонро ба ӯҳда дошт. З. Шаҳидӣ аз аввалин оҳангсозонест, ки барои ташаккули мусиқии муосири тоҷик хизматҳои шоён кардааст. То солҳои 60-ум дар эҷодиёти Шаҳидӣ суруду романҳо мавқеи калон доштанд. Дар байни онҳо таронаҳои «Хонаи мо» (шеъри А.Лоҳутӣ), «Иди зафар» (шеъри Б.Раҳимзода), «Дарвоз» (шеъри А.Деҳотӣ), романсҳои «Зи сӯзи сина» (шеъри Ҳилолӣ), «Эй сорбон» (шеъри Саъдӣ) машҳуранд. Ӯ муаллифи операҳои «Комде ва Мадан» (1960), «Ғуломон» (1948), опереттаи «Духтаре аз Душанбе» (1968) мебошад, ки бо мусиқии халқии тоҷик робитаи зич доранд ва бо шаклу мундариҷа, нафосату латофат ва рангорангии тобишҳои мусиқӣ дар байни алоқамандони ин соҳа маълуму машҳуранд. Асарҳои симфонии З.Шаҳидӣ аз қабили достонҳои симфонии «Соли 1917», «Ба ёди М.Турсунзода» (1983) мусиқии касбии тоҷикро бою рангин кардааст. Дар достонҳои «Бузрук» ва «Симфонияи мақомҳо» ӯ кӯшидааст, ки навоҳои хуши «Шашмақом»-ро истифода намояд. З.Шаҳидӣ муаллифи мусиқии якчанд намоишномаҳои мусиқӣ ва драмавӣ мебошад: «Арӯси панҷсӯма», «Шаҳри ман» ва ғ. Ба қалами ӯ инчунин чор суита ва якчанд кантата тааллуқ дорад. Ӯ ба як қатор филмҳо, аз ҷумла «Дӯсти ман Наврӯзов» (1959), «Вақти зангирии писарам расид» (1960) ва ғ. мусиқӣ эҷод кардааст. З.Шаҳидӣ Депутати Совети Олии РСС Тоҷикистон (даъватҳои 1-4) буд. Ӯ лауреати Мукофоти давлатии ба номи Абӯабдуллоҳи Рӯдакӣ (1985) буда, бо ордени Байрақи Сурхи Меҳнат, «Нишони фахрӣ» ва медалҳо мукофотонида шудааст. Зиёдулло Шаҳидӣ 25 феврали соли 1985 дар шаҳри Душанбе вафот кардааст.

Иди зафар

Омад хабар зи Маскав,
Аз фатҳу нусрати нав,
Халқи далер бишнав,
Ин хушхабар муборак!
Иди зафар муборак!

Имрӯз халқи кишвар,
Марду зани диловар,
Ҳар як сухан кунад сар,
Гӯяд: - Зафар муборак!
Бахти башар муборак!

Эй кишвари кабирам,
Ҳам лашкари далерам,
Сарбози беназирам,
Ин хушхабар муборак!
Иди зафар муборак!

Эй халқи меҳрубонам,
Урдуи қаҳрамонам,
Васфи туро бихонам,
Гӯям: - Зафар муборак!
Бахти башар муборак!

Шоири ширинкалом Боқӣ Раҳимзода шаби 9 майи соли 1945 аз расидани Рӯзи Ғалаба бар Германияи фашистӣ, ки ба воситаи радио эълон гардида буд, хушҳол гашта, шеъри «Иди зафар»-ро иншо мекунад ва худи ҳамон шаб ба композитори шинохта Зиёдулло Шаҳидӣ (онҳо дар ҳамсоягӣ мезистанд) занг зада, аз навиштани шеъраш ба ин муносибат, телефонӣ дарак медиҳад. Устод Шаҳидӣ ҳамон замон Б. Раҳимзодаро ба хонааш даъват мекунад ва ба эҷоди мусиқии он шеър шурӯъ мекунад. То чашми шаб равшан шудан З. Шаҳидӣ сурудро эҷод карда, худаш онро ба Б. Раҳимзода иҷро мекунад. Рӯзи дигар устод Шаҳидӣ овозхони хушсалиқа Шоиста Муллоҷоноваро ба хонааш таклиф карда, дар муддати кӯтоҳ сурудро ба ӯ ёд медиҳад. Баъди як рӯз суруди «Иди зафар» дар фонди радио сабт шуда, ба воситаи радио дар тамоми қаламрави ҷумҳурӣ шунавонида мешавад. Дере нагузашта ин суруд дар байни мардум машҳур мегардад. Бояд гуфт, ки суруди «Иди зафар» то имрӯз дар Рӯзи Ғалаба – 9 Май ба воситаи телевизион ва радио шунавонида мешавад ва яке аз сурудҳои беҳтарин ба шумор меравад.