Зеҳни сунъӣ шумораи умумии дарахтони рӯи Заминро ҳисоб кард

Олимон барои муайян кардани шумораи дарахтони рӯи Замин аз имкониятҳои зеҳни сунъӣ истифода бурданд.

Система тасвирҳои моҳвораӣ, маълумоти инвентаризатсияи ҷангалҳо ва беш аз 400 ҳазор ченкунии заминҳои саҳроро таҳлил кардааст.

Натиҷаҳо нишон доданд, ки дар рӯи Замин тақрибан 3,04 триллион дарахт мерӯяд. Ин маънои онро дорад, ки ба ҳисоби миёна ба ҳар як сокини сайёра тақрибан 390 дарахт рост меояд.

Дар тӯли даҳсолаҳо олимон бар он ақида буданд, ки дар рӯи Замин ҳамагӣ 400 миллиард дарахт мавҷуд аст. Ин ҳисобҳо асосан ба аксҳои моҳвораӣ такя мекарданд. Аммо аксҳои моҳвораӣ танҳо ҷойгиршавии ҷангалҳоро нишон медиҳанд, на шумораи дарахтонро.

Гурӯҳи байналмилалии олимон таҳти роҳбарии эколог Томас Кроутер бори аввал харитаи ҷаҳонии зичии дарахтонро таҳия намуд. Мувофиқи натиҷаҳои онҳо, шумораи дарахтон нисбат ба ҳисобҳои пешина қариб ҳашт маротиба зиёд будааст.

Ба гуфтаи муҳаққиқон, зичии аз ҳама зиёди дарахтон дар ҷангалҳои бореалии шимоли Канада, Аляска, Скандинавия ва Россия ба мушоҳида мерасад. Иқлими сард барои дарахтони сӯзанбарг хеле мусоид аст.

Аз рӯи шумораи умумӣ бошад, бештарини дарахтон дар ҷангалҳои тропикӣ ва субтропикии Амрикои Ҷанубӣ, Африқои Марказӣ ва Осиёи Ҷанубу Шарқӣ мерӯянд. Дар ин минтақаҳо зиёда аз 40 фоизи тамоми дарахтони рӯи Замин ҷойгир шудаанд. Танҳо ҷангали тропикии Амазонка садҳо миллиард дарахтро дар бар мегирад.

Олимон огоҳ мекунанд, ки танҳо шинондани ниҳол роҳи ҳалли мушкили буридани ҷангалҳо нест. Барои ба дарахти комил табдил ёфтани ниҳолҳо даҳсолаҳо лозим аст. Илова бар ин, гуногуншаклии биологии ҷангалҳои сунъӣ камтар буда, барои ҳайвонот камтар муҳити зист фароҳам меоранд ва ба бемориҳо ва хушксолӣ низ тоб намеоранд. Аз ин рӯ, муҳаққиқон таъкид мекунанд, ки ҳифзи ҷангалҳои мавҷуда аз бунёди ҷангалҳои нав ҳам муҳимтар аст.