ТАШАККУЛ ДОДАНИ ҚАДУ ҚОМАТИ РОСТ

Қомат андом, тарзи ист, ҳолати табиии инсон мебошад. Қаду қомати рост нишонаҳои зерин дорад: қомату китфҳои рост, сари андаке боло гирифташуда ва китфони васеъ. Одамро аз рӯйи қаду қоматаш мешиносанд.

Вазифаи асосии қомати инсон эмин нигоҳ доштани узвҳои ҳаракатдиҳанда аз бори зиёд ва осеб аст. Шахсе, ки қаду қомати зебо дорад, диққати атрофиёнро ҷалб мекунад.

Дар баробари ин дар инкишофи қаду қомати наврасон баъзе монеаҳо мушоҳида мешавад: каҷ шудани сутунмуҳра, ҳамеша хам шуда нишастан, миёни лӯнда, миёни лӯндаи хамшуда, миёни ҳамвор, қомати номутаносиб ва ғайра. Агар хонанда дар паси мизи дарс доим хам шуда ё бо сандуқи сина такя кунад, ё баръакс китфи худро боло бардошта нишинад, кӯзапушт шуданаш мумкин аст. Зеро устухони наврасон ҳоло он қадар сахту мустаҳкам нашудааст. Устухони наврасон нисбати устухони калонсолон чандир буда, зуд тағйир меёбад. Аз каҷ нишастан метавонад сутунмуҳра каҷ шавад ва сабаби дарди сар, фаромӯшхотирӣ, мондашавӣ ва ғайра гардад. Дар натиҷаи монеаҳои қомат мушакҳои бадан суст мешаванд, ки рост нишастан вазнин аст.

Қаду қомати зебою рости одамони солим то пиронсолӣ хуб нигоҳ дошта мешавад. Хонанда ҳангоми тайёр кардани дарс бояд ҷойи қулай ва мувофиқ дошта бошад.

Аз ин рӯ, ба мақсади пешгирӣ намудани бемориҳои сутунмуҳра бояд аз қоидаҳои дурусти нишаст ва маслиҳатҳои муфид истифода баред:

* Сари миз рост нишаста, сарро каме ба пеш хам кунед.

* Барои он ки зуд монда нашавед, ба пушти курсӣ такя кунед.

* Ҳар ду пойро ба рӯйи фарш баробар гузоред, бо нӯги пой ё пошнаи пой нашинед.

* Дастонро дар рӯйи миз ё парта озод гузошта, китфонро баробар нигоҳ доред.

* Ҷойи хоб бояд кушод, болишт ҳамвор ва кӯрпача сахт бошад. Рӯболо ба пушт ва ба паҳлуи рост хоб рафтан беҳтар аст. Давомнокии хоби наврасон набояд аз 8-10 соат кам бошад. Хонанда баъди аз мактаб омадан бояд 1-1,5 соат истироҳат кунад, то ки мушакҳои пушт ва сутунмуҳра дам гиранд.

* Ҷое, ки барои дарстайёркунӣ ҷудо шудааст, бояд равшании хуб дошта бошад.

* Ҷузвдони мактабиро беҳтараш дар пушт гиред (ҳама вақт онро бо як даст бурдан мумкин нест).

* Мунтазам ғизоҳои гуногун, хусусан маҳсулоти ширӣ, моҳӣ, мева, тухм, асал ва ғайраҳоро истеъмол кунед.