Фазлиддин Муҳаммадиев

Фазлиддин Муҳаммадиев 15 июни соли 1928 дар шаҳри Самарқанд дар оилаи муқовабанд ба дунё омадааст. Баъди хатми мактаби миёна ходими адабии рӯзномаи " Тоҷикистони сурх" буд. Соли 1951 мактаби марказии комсомоли назди Кумитаи марказии комсомолро дар шаҳри Маскав хатм намуд ва ба кори рӯзноманигорӣ машғул шуд. Ҷонишини муҳаррири рӯзномаи "Ҷавонони Тоҷикистон" ("Комсо-моли Тоҷикистон "), муҳаррири "Газетаи муаллимон", мудири шӯъбаи рӯзномаи " Тоҷикистони Советӣ", котиби масъули маҷаллаи "Занони Тоҷикистон ", мудири шӯъбаи наср ва котиби масъули маҷаллаи "Шарқи сурх" ("Садои Шарқ") буд.

Соли 1962 курсҳои олии адабиро дар назди Институти адабии ба номи М. Горкий дар шаҳри Маскав хатм намуда, дар идораи маҷаллаи "Хорпуштак", киностудияи "Тоҷикфилм" ва нашриёти "Ирфон" кор кардааст. Баъдтар вазифаҳои мудири нашрияи Сарредаксияи Энсиклопедияи Советии Тоҷик, сармуҳаррири Кумитаи давлатии Ҷумҳурии Тоҷикистон доир ба Кинематографияро ба ӯҳда дошт.

Аз июни 1978 котиби Раёсати Иттифоқи нависандагони Тоҷикистон интихоб шуда кор кардааст. Очерку ҳикояҳои аввалини Ф. Муҳаммадиев дар нимаи дуюми солҳои 50-ум дар матбуот пайдо шуданд. Масалан: "Раиси нав" (1955), "Муҳоҷирон" (1956), "Фаттоҳ ва Музаффар" (1958) ва ғайраҳо.

Соли 1958 маҷмӯаи очерку ҳикояҳои ӯ, соли 1960 повести "Таркише, ки ба вуқӯъ наомад", соли 1963 "Одамони кӯҳна", соли 1964 "Бибӣ - Зайнаб", соли 1969 маҷмӯаи ҳикояҳо таҳти унвони "Сози мунаввар" аз чоп баромадаанд.

Соли 1974 романи "Палатаи кунҷакӣ" баромад. Қариб ҳамаи асарҳои ӯ ба забони русӣ тарҷума шудаанд.

Асарҳои Ф. Муҳаммадиев ба забонҳои ӯзбекӣ, латишӣ, арманӣ, эстонӣ, қазоқӣ, туркманӣ, қирғизӣ, украинӣ, белорусӣ, немисӣ, полякӣ, арабӣ, венгерӣ, чехӣ ва булғорӣ низ тарҷума шудаанд.

Аз рӯи сенарияҳои Ф. Муҳаммадиев кино-студияи "Тоҷикфилм" филми бадеии кӯтоҳметражи "Задухӯрд" (1973); филми мустанади "Субҳи кишвари ман" (1974), филми бадеии "Вохӯрӣ дар дараи марг" (1980) ва ғайраро ба навор гирифт. Филми бадеии "Вохӯрӣ дар дараи марг" дар кинофестивали XIII сазовори мукофот ва дар кинофестивали мамлакатҳои Осиё, Африка ва Америкаи Лотинӣ, ки дар шаҳри Тошкент гузашт, сазовори диплом гардид.

Фазлиддин Муҳаммадиев дар соҳаи тарҷумаи бадеӣ меҳнати самараноку сермаҳсул ба харҷ додааст. Тарҷумаҳои тоҷикии романҳои Андре Стил "Зарбаи аввал", М. Садовяну "Ҷазираи гулҳо", повестҳои Чингиз Айтматов "Ҷамила", "Алвидоъ, Гулсара", М. Левин "Ҳаяҷони саввум", А. Қаҳҳор "Модаркалони меҳрубони ман", "Овоз аз тобут", В. Губарев "Мӯъҷизакори бузург" ва ҳикояҳои алоҳидаи Чехов, Драйзер ва нависандагони пешқадами адабиёти муосири хориҷӣ ба қалами Фазлиддин Муҳаммадиев мутааллиқанд.

Фазлиддин Муҳаммадиев бо унвони ифтихории Корманди Шоистаи маданияти Тоҷикистон ва Ҷоизаи ҷумҳуриявии ба номи Абӯабдулло Рӯдакӣ мушарраф гардидааст.

Ӯ соли 1986 фавтидааст.